Kryetari i Komunës së Istogut, Haki Rugova, ka dalë sot para Gjykatës Themelore për t’u përgjigjur lidhur me akuzat për konflikt interesi që rëndojnë ndaj tij,
Rugova, po akuzohet se më 1 gusht 2014 në cilësinë e kryetarit të Komunës së Istogut, me dashje ka marrë pjesë personalisht në nënshkrimin e kontratës ‘Ndërtimi i kanalizimit fekal në fshatin Cerrcë-Lubozhdë- faza e parë”, për tenderin që e fitoi kompania MA-CON, në pronësi të vëllait të tij, Gani Rugovës, në vlerë prej afër 290 mijë eurosh.
Haki Rugova në seancë tha se nënshkrimin e dokumentit e kishte bërë në mënyrë aksidentale, pasi sipas tij, ai i kishte ardhur në mesin e shumë dokumenteve për nënshkrim.
Duke u përgjigjur në pyetjet e avokatit Besnik Berisha, Rugova tha se as nuk ka marrë pjesë në procedurën e prokurimit dhe as nuk e ka favorizuar në mënyrë të kundërligjshme kompaninë e vëllait të tij, shkruan Gazeta Sinjali.
Avokati Berisha e këshilloi klientin e tij që të mos deklarohet deri në fjalën përfundimtare.
Gani Rugova, vëllai i kryetarit Haki Rugova, tha se nuk dëshiron të deklarohet duke shfrytëzuar të drejtën e tij për lirimin nga detyrimi për të dëshmuar. Kurse, deklaratat e dëshmitarëve Zize Bujupaj, Naser Gjocaj, Rrustem Gashi dhe Sylë Maksutaj u lexuan në seancë, të dhëna në shqyrtimet e mëparshme gjyqësore, u lexuan në seancë pa prezencën e tyre.
