Pas suksesit të arritur vitin e kaluar, gjimnazi “Hivzi Sulejmani” merr sërish pjesë në Programin për Promovimin e Vlerave Humane (PVH), i cili organizohet nga Kryqi i Kuq i Kosovës. Ky program ka për qëllim të përfshijë të rinjtë në iniciativa me ndikim shoqëror, duke promovuar vlera si empatia, solidariteti dhe bashkëpunimi.
Në edicionin e mëparshëm, ekipi i gjimnazit, nën udhëheqjen e diseminatorëve Majlinda Hykolli-Prebreza dhe Jeton Ismajli, arriti një fitore të rëndësishme, duke zënë vendin e parë me pesë projekte, përfshirë edhe një projekt me karakter interkulturor. Këtë vit, udhëheqjen e projektit e kanë marrë profesoresha Blenda Fetahu dhe psikologia Arta Hiseni, të cilat po drejtojnë me përkushtim nxënësit në rrugën drejt ndryshimeve pozitive në shoqëri.
Deri tani, ekipi ka realizuar tri punëtori dhe është duke punuar intensivisht në zhvillimin e projekteve të reja, detajet e të cilave do të bëhen publike pas përfundimit të garës. Për të siguruar mjetet financiare për zbatimin e projekteve, nxënësit kanë organizuar një mbrëmje filmash me pagesë (“Movie Night”), si dhe aktivitete kreative përmes shitjes së kartolinave, pikturave, rruazave dhe punimeve artizanale të punuara vetë nga ta.
Ky angazhim është mbështetur fuqishëm nga drejtori i shkollës, z. Amir Pllana, i cili ka qenë pranë ekipit në çdo hap të këtij rrugëtimi. Ndërkohë, çdo moment i rëndësishëm po kthehet në kujtim falë fotografit Bleart Fetahu, i cili po dokumenton me pasion punën e palodhshme të ekipit.
Me zemra plot motivim dhe synime të qarta, ekipi i gjimnazit “Hivzi Sulejmani” është më i gatshëm se kurrë për një tjetër kapitull të suksesshëm në PVH – duke treguar fuqishëm se të rinjtë janë forca lëvizëse e së ardhmes!
Lajmi është dërguar nga Gjimnazi ” Hivzi Sulejmani” në redaksinë e TelegramitSot????
