Gjermania dhe Franca përmes një komunikate të përbashkët pas zgjedhjeve parlamentare të 14 shkurtit kanë uruar Albin Kurtin dhe Vjosa Osmanin për rezultatin ku dolën fitues, gjersa kanë kërkuar që sa më shpejtë të formohet qeveria e re dhe të zgjidhet presidenti i Kosovës.
Ambasadori i Gjermanisë në Kosovë, Jorn Rohde përmes një postimi në Twitter ka thënë se presin që të formohet qeveria dhe të vendoset për presidentin sapo të finalizohen rezultatet e zgjedhjeve të 14 shkurtit.
Gjermania dhe Franca do të përkrahin Kosovën në agjendën lidhur me reformat ku përfshihet forcimi i sundimit të ligjit, lufta kundër korrupsionit dhe krimit të organizuar.
“Së bashku me BE-në ne do të mbështesim Kosovën në menaxhimin e pandemisë COVID 19”, thuhet në komunikatë.
Franca dhe Gjermania janë shprehur të gatshëm që të mbështesin vazhdimin e dialogut të lehtësuar nga Bashkimi Evropian.
