Ish-kandidati për kryetar të vendit, Seremb Gjergji, ka thënë se kësaj radhe nuk do t’i hyjë garës për t’u bërë president pasi që e sheh si të pamundur duke parë divergjencat brenda Kuvendit të Kosovës.
Në një intervistë për klankosova.tv, ai ka thënë se kryetari i partisë Aleanca për Ardhmërinë e Kosovës, Ramush Haradinaj, nuk do të mund t’i plotësojë kushtet për t’i hyrë një gare të tillë.
“Parlamenti i Kosovës në vitin 2011, ka nxjerre rezolutë që zgjedhjet presidenciale të kalojnë me votën e lirë. Parlamenti në atë kohë ka krijuar një komision në krye me Arsim Bajramin i cili në fund të vitit 2012 ka dalë me propozimin për zgjedhje presidenciale me votën e lirë. Pasi ata kanë dalë me një propozim të tillë, unë kam shprehur interesimin që të kandidoj si i pavarur për president të vendit”.
“Prej asaj dite e deri më sot, Kuvendi nuk i ka bërë ndryshimet e nevojshme dhe pozita e presidentit vazhdon të mbetet peng i kalkulimeve matematikore në politikën e Kosovës”.
“Dëshira e Haradinajt për t’u bërë president është vetëm një dëshirë e partisë së tij sepse dihet se dihet që nevojiten minimumi 61 vota për t’u zgjedhur president; ndërsa herën e parë dhe të dytën nevojiten dy të tretat e votave”.
Gjergji ka theksuar se para se të hyjë në garë një kandidat për president, duhet t’i mbledhë 30 nënshkrime nga deputetët në mënyrë që të ketë mundësi të futet në listë për Presidentit.
“AAK nuk i plotëson këto kushte dhe një prej tyre është se nuk i ka 30 deputetë. Nëse PDK futet në koalicion qeveritar; atëherë votat dhe nënshkrimet e LDK-së i merr PDK-ja”.
“Kandidat i ardhshëm për president të Kosovës nga radhët e PDK-së do të jetë Vlora Çitaku dhe Ramush Haradinajt mund t’ia japin nënshkrimet vetëm sa për ta plotësuar kriterin e dy kandidatëve sepse Kushtetuta kërkon dy e më shumë kandidatë”.
“Unë herën e kaluar kam kandiduar dhe kam arritur t’i siguroj vetëm 12 nënshkrime. Kështu që nuk kam pasur mundësi të hyjë në garë. E kësaj radhe është edhe më e pamundur kur dihen divergjencat në kuadër të Kuvendit të Kosovës”.
“Për momentin nuk kam në plan që të kandidoj për pozitën e presidentit përmes Kuvendit, por nëse Kuvendi bën ndryshime për zgjedhjet e lira për president siç e ka Evropa dhe Ballkani, unë do të jem kandidati serioz dhe kryesor në këtë garë”.
Sipas tij, secili kandidat për president në Kuvend apo jashtë Kuvendit duhet ta ketë një platformë në mënyrë që t’i tregojë popullit se ku synohet të arrihet dhe se cili është synimi strategjik i politikës së jashtme dhe të brendshme kosovare.
