Ushtruesi i detyrës së drejtorit të Klinikës Infektive, Izet Sadiku, ka thënë se me uljen e rasteve me COVID-19 ditëve të fundit ka rënë edhe numri i të hospitalizuarve në këtë klinikë.
Sadiku bëri me dije se kjo klinikë sot mund të pranojë deri në 50 pacientë.
‘‘Prej 30 marsit 2020, ne kemi pasur vetëm pesë ditë pushim. Por ky është misioni ynë. Përveç angazhimit, kjo na ka dhënë mundësi të tregojmë atë pjesën tonë hipokrate, apo etike. Për këtë kohë, mbi 20 mijë pacientë kanë qenë në Klinikën Infektive. Ka filluar ulja e shifrave, në javët e fundit kemi rënie, nga 120 sa kanë qenë javën e kaluar, kemi 70 pacientë të hospitalizuar. Ne kemi 120 shtretër të shfrytëzueshëm. Gjatë kësaj periudhe shpeshherë situata ka dalë nga kontrolli. Por sot ne mund të pranojmë deri në 50 raste”, u shpreh ai.
Sadiku bëri me dije se varianti britanik është në masë të madhe në Kosovë.
”Ne kemi pasur një përfshirje më të madhe të familjeve në valën e fundit. Tash shumicën e rasteve kur ka dalë një person në familje pozitiv me COVID-19, ka dalë e gjitha familja, çka na bën të dyshojmë në variantin britanik që ka një shpërndarje më të lehtë. Ne në këtë fazë kemi pasur të vdekur edhe të moshave të reja, edhe gra shtatzëna. Por jemi duke u përpjekur ta dalim”, deklaroi ushtruesi i detyrës së drejtorit të Klinikës Infektive në KTV.
Sadiku në fund bëri thirrje që të respektohet masat anti-COVID, në mënyrë që sipas tij, të ruhet shëndeti i njëri-tjetrit.