Sinjali para pak minutash raportoi se është arrestuar zyrtari policor, Visar Basha, nën dyshimin për keqtrajtim gjatë ushtrimit të detyrës zyrtare në një rast në stacionin policor Qendra në Prishtinë. Gazeta Sinjali mëson se përveç tij, janë suspenduar edhe tre policë të tjerë lidhur me këtë rast.
E gjitha ngjarja sipas IPK-së filloi pas marrjes së një informacioni se një qytetar pretendonte për tejkalim të autorizimeve policore gjatë përdorimit të forcës nga zyrtari policor, Visar Basha në stacionin policor Qendra në Prishtinë.
Qytetari paraprakisht ishte shoqëruar nga policia në stacionin policor me dyshimin për shkak të mos respektimit të masave antiCOVID.
“Arrestimi i tij është bërë me dyshimin se i njëjti ka kryer veprën penale “keqtrajtim gjatë ushtrimit të detyrës zyrtare” kurse me vendim të prokurorit të njëjtit i është caktuar masa e ndalimit për 48 orë. Edhe qytetarit të shoqëruar në stacionin e policisë i është caktuar masa e ndalimit për 48 orë nga Prokuroria”, thuhet në njoftimin e Inspektoratit Policor.
