Ministrja e Punëve të Jashtme, Donika Gërvalla ka folur për postimin në gjuhën angleze, në të cilin si shenjë reagimi ndaj arrestimit të gazetarit bjellorus Roman Prostasevich, kërkohej nga SHBA-ja e BE-ja që të veprohej ndaj Rusisë.
MPJ-ja ka marrë kritika lidhur me nivelin e gjuhës angleze, të përdorur për të dërguar mesazh diplomatik tek vendet mike.
Gërvalla ka thënë se merr përgjegjësinë për atë postim dhe se teksti është përmirësuar.
“Ju jap plotësisht të drejtë, e marr përgjegjësinë politike për atë tweet. Përpjekja për të futur në 270 shkronja një mesazh ka shkaktuar tërë atë.
Ka shkaktuar një tekst që është. E kemi zgjeruar të njëjtin tekst, i kemi shtuar lidhëzat që kanë munguar dhe mendojmë se tani është një tekst i kuptueshëm. Mesazhi aty nuk është se Kosova është e fortë, por se qëndron fort krah aleatëve të saj. Keni shumë të drejtë, diplomacia digjitale është tejet e rëndësishme, dhe asnjëherë nuk duhet të lihet pas dore.
Rreth kësaj teme nuk e di se çka mund të shtoj më”, u shpreh ajo gjatë raportimit në Komisionin për Politikë të Jashtme.
