Një person është lënduar mbrëmjen e së premtes në fshatin Kosinë të Ferizajt pasi është goditur me një mjet të fortë nga një person tjetër,
Lajmin e ka konfirmuar zëdhënësi i Policisë në Ferizaj, Kanun Veseli, i cili ka bërë të ditur se pas marrjes së ndihmës së parë, personi i lënduar është dërguar për në QKUK.
“Me datën 07.05.2021 rreth orës 22:49 në fshatin Kosinë të Ferizajt ka ndodhur një incident , ku një person ka goditur me një mjet të fortë një person tjetër duke i shkaktuar lëndime trupore. Pas marrjes së ndihmës së parë në Emergjencën e Ferizajt, i njëjti është dërguar në QKUK Prishtinë dhe po trajtohet atje”, tha Veseli për Sinjalin.
Po ashtu, ai bëri të ditur se lidhur me rastin është identifikuar një person, i cili pas mesnate është intervistuar nga Policia dhe me vendim të prokurorit, është ndaluar për 48 orë.
“Është identifikuar i dyshuari dhe vendndodhja e tij dhe pas mesnate i njëjti është shoqëruar në stacionin policor të Ferizajt . Pas intervistimit nga policia në prani të avokatit mbrojtës , me vendim të prokurorit të PTH Ferizaj , i njëjti është ndaluar për 48 orë”, shtoi më tej ai.
