Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes personave në vendin tonë. Për pasojë, konfliktet jo rrallëherë eskalojnë edhe në rrahje brutale, për çka nevojitet ndërhyja e Policisë, raporton Gazeta Sinjali.
Një rast i ngjajshëm ka ndodhur dje në Llukë të Epërme të Deçanit, ku pas një mosmarrëveshjeje, dy persona i kanë sulmuar fizikisht dy persona të tjerë dhe për pasojë të dyshuarit kanë përfunduar në prangat e Policisë.
Sinjali mëson ekskluzivisht se dy të dyshuarit që u arrestuan në lidhje me këtë rast janë Sami Tahirukaj dhe Leonit Tahirukaj.
Sipas informacioneve që posedon Sinjali, policia ka kryer edhe kontroll në shtëpinë e njërit prej të dyshuarve, ku ka gjetur dhe ka konfiskuar një pistoletë.
Pas intervistimit me vendim të prokurorit, dy të dyshuarit janë dërguar në mbajtje, ndërsa hetimet për këtë rast veçse kanë filluar.
Ndërkaq, viktimat janë dërguar për të pranuar ndihmë mjekësore për shkak të lëndimeve që kanë pësuar.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
