26-vjeçari Agon Musliu ka gjetur vdekjen duke u hedhur nga kati i katërt i karantinës në Qendrën e Studentëve në Prishtinë, pasi ishte kthyer nga Gjermania.
Nga prindi i tij u ishte bërë kërkesë institucioneve për mosmbajtje në karantinë, pasi djali kishte probleme shëndetësore.
Babai i Agonit, Naimi në një intervistë në media tha se kishte edhe dokumente se djali i tij nuk ishte mirë me shëndet, dhe të njëjtat ua kishte paraqitur edhe institucioneve. Ai tha se Agoni kishte problem me veshkë, e edhe stres.
Sipas dokumentacionit ditë më parë babai i Agon Musliut, Naimi, kishte kërkuar nga Komuna e Gjilanit për të ndihmuar në kthimin e djalit të tij, Agonit nga Gjermania, pasi sipas Naimit, djali i tij vuante nga një sëmundje në mëlçi.
Këtë kërkesë Komuna e kishte adresuar në ambasadën e Kosovës në Gjermani, ku edhe në listë është shënuar se Agoni ishte i sëmurë dhe kishte vërtetim.
Ndërkohë Ministria Shëndetësisë ka mohuar se 26-vjeçari që vdiq të dielën në Qendrën e Studentëve, ka prezantuar ndonjë raport se vuan nga ndonjë sëmundje me rastin e kthimit nga Gjermania në Kosovë.
Në një intervistë të dhënë mbrëmë, Rexhep Selimi nga VV tha se letra për problemet e të riut me shëndet mendor erdhën shumë vonë në adresën e ministrisë.
‘’Problemet për shëndetin e tij mendor kanë ardhur shumë vonë në qendrën operative emergjente në Prishtinë.’’
‘’Në ora 17:03 minuta ka ardhur e-maili për problemet mendore që i kishte personi. Ishte shumë vonë.
Në ora 17:30 kishte ndodhur rasti’’
‘’Duhet të hetohet rasti në tërësi. Politika dhe politizimi nuk duhet të ndodhin para hetimit. Po e ngarkojnë opinionin me informacione të rreme të panevojshme.
Duket se ata që dështuan të realizojnë planet politkke duke shfrytëzuar pandeminë, po përpiqen të përfitojnë me familjen e respektuar nga Livoqi i Gjilanit dhe të shtojnë dhimbjen’’, shton ai.
Gjatë ditës, babai i të ndjerit fajësoi kryeministrin në detyrë, Albin Kurti dhe ministrat në detyrë Arben Vitia e Xhelal Sveçla për humbjen e të birit.
Prokuroria ka njoftuar se ka nisur hetimet për këtë ngjarje tragjike.
