Dialogu në mes të Kosovës dhe Serbisë është në një udhëkryq të madh, pasi SHBA dhe BE po garojnë se kush do të jetë ndërmjetësuesi.
Ka qenë emisari i presidentit Donald Trump ai që, i pari, njoftoi për rinisjen e dialogut në Shtëpinë e Bardhë më 27 qershor, por BE-ja bëri lëvizje në momentet e fundit, shkruan Reporter.net.
Sot, siç po raportojnë mediat, BE-ja ka thirrur në Bruksel Kosovën e Serbinë, dy ditë para takimit që do të kenë në Washington.
Por, sidoqoftë, konfirmime zyrtare nga palët ka vetëm për takimin ku “kumbar” do të jetë presidenti amerikan Trump dhe do të udhëhiqet nga Richard Grenell dhe këshilltari i Trump për sigurinë kombëtare, Robert O’Brien.
Pas këtij takimi, siç konfirmon këshilltari i presidentit Hashim Thaçi, Blerim Shala, dialogu vazhdon në një fazë tjetër në Paris.
“Me 17 korrik, në Paris, Presidenti i Francës Emanuel Macron dhe Kancelarja e Gjermanisë Angela Merkel, do të jenë në ballë të Samitit tjetër të rëndësisë sipërore, në mes të autoriteteve të Kosovës dhe Serbisë”, ka thënë Blerim Shala në një opionin të publikuar sot.
E sipas njohësit të vjetër të dialogut, Shalës, Samiti i mbajtur në Francë nën patronatin e presidentit Emmanuel Macron do të pasohet me një takim tjetër në Bruksel. Shala thotë se këtë takim të tretë prijës do të jetë Miroslav Lajcak, emisar special i BE-së për dialogun.
“Synimi i përbashkët i të tri këto ngjarjeve madhore që pritet të ndodhin në tri javët vijuese, në Ëashington, Paris dhe Bruksel është një dhe i vetmi: Arritja e Marrëveshjes për normalizimin e plotë të marrëdhënieve në mes të Kosovës dhe Serbisë”, thekson Shala.
Sidoqoftë, Kosova nuk është unike në rinisjen e dialogut, pasi ka kundërshti tek partitë lidhur me ndërmjetësuesin. Qeveria aktuale ku përfshihen LDK, AAK dhe Nisma, së bashku me presidentin Thaçi, janë për dialog të ndërmjetësuar nga SHBA, ndërkohë që VV haptazi e kundërshton dialogun me Richard Grenell. PDK, ndërkohë, formalisht e ka përkrahur rinisjen e dialogut dhe përkrahjen e SHBA-së, mirëpo ka refuzuar të shkojë në takimin përgatitor të thirrur nga kryeministri Avdullah Hoti
