Deputetja nga radhët e Partisë Demokratike të Kosovës, Floretë Zejnullahu, tha sot në seancën e Kuvendit se familja presidenciale e Kosovës, Osmani-Sadriu, po e gërryen buxhetin e Kosovës me paga super luksoze që e kalojnë shifrën e mbi 70 mijë euro vetëm për 1 vit.
“Nga deklarimi i pasurisë së tyre në Agjencinë Kundër Korrupsionit, Presidentja Osmani merr nga buxheti i Kosovës më shumë se 33 mijë euro vetëm pagë për 1 vit. Bashkëshorti i saj i cili është avancuar tash në diplomaci, merr mbi 36 mijë euro paga për 1 vit”, tha ajo.
Gjithashtu Zejnullahu i krahasoi pagat e familjes presidenciale me pagën minimale në Kosovë.
“Paga minimale në Kosovë është 170 euro, kjo i bie që presidentja Vjosa Osmani i merr 16 paga minimale të Kosovës për një muaj. Po ashtu bashkëshorti i saj i bie që i merr 17 paga minimale, apo së bashku marrin gjatë një muaji 33 paga minimale të shtetit tonë”, tha Zejnullahu.
Ajo foli edhe për mënyrën e jetesës që po e bëjnë pushtetarët e rinj, që sipas saj votat i fituan duke proklamuar barazi.
“Presidentja Osmani tashmë ka deklaruar se ka blerë shtëpi të re në lagjen më luksoze të Prishtinës, “Marigona Hill”, aty ku kanë blerë edhe disa prej ministrave e zyrtarëve të Qeverisë së Albin Kurtit dhe Vetëvendosjes”, deklaroi ajo.
Deputetja Zejnullahu po ashtu e akuzoi kryeministrin, Albin Kurti, për pushimet e tij luksoze në ishujt grek.
“Albin Kurti e harroi turizmin kombëtar! Albin Kurti e ka harruar Durrësin, Vlorën, Sarandën. Kur ishte në opozitë, përmendja e Shqipërisë dhe e forcimit të ekonomisë kombëtare ishte veç një shtihim”, tha Zejnullahu.
