Kandidati për të parin e Prishtinës për secilën lagje ka plane për zgjidhje konkrete të problemeve të vazhdueshme e të zvarritura nga qeverisjet e mëparshme, siç ndodh me rrugën “Muaharrem Fejza”, e cila ka kohë që është bërë pengesë për të gjithë banorët dhe lagjet që lidhen me të.
Daut Haradinaj, që nga fillimi i këtyre zvarritjeve për rikonstruktimin e kësaj rruge, ka ngritur zërin dhe tërhequr vërejtën për neglizhencë totale të qeverisë komunale.
Sipas Haradinajt, ‘saga’ e kësaj rruge dhe kjo mënyrë e papërgjegjësie totale, do të marrë fund, përgjithmonë.
Ndaj, rikonstruktimit i rrugës “Muharrem Fejza”, bashkë me rrugët lidhëse me të, janë zgjidhjet e shpejta të udhëheqjes në ardhje, përfshirë këtu edhe infrastrukturën nëntokësore dhe asfaltimin e saj.
Ndërsa për Lagjen Mati, dy janë çështje që Haradinaj do të fokusohet gjatë mandatit të tij: ndërtimi i rrugës “A” si dhe proces të shpejtë të pranimit teknik të ndërtesave me banim kolektiv.
Sipas këtij plani, ndërtimi i rrugës A do ta shkarkojë ndjeshëm qarkullimin e dendur në komunikacion, ndërsa ndërtimi i kolektorit mbi lumin Mat do ta largojë rrezikun e infeksioneve dhe kundërmimin e tmerrshëm nga ujërat e zeza, që derdhen mbi sipërfaqe.
Po ashtu, ndërtimi i një çerdhe publike është nënvizuar në programin e Haradinajt, kjo edhe për faktin se kostoja e lartë e kopshteve private, po i detyron prindërit të kësaj lagjeje ta rrezikojnë vendin e punës për t`u kujdesur për fëmijët.
Që në fillim të qeverisjes nga Haradinaj, procesi i pranimit teknik të objekteve apo banesave kolektive do të përfundojë shpejt dhe banorët të pajisen me certifikatën e pronësisë, e cila u mundëson që pasuria e tyre e patundshme të jetë aset hipotekar, thuhet në këtë program.
Dihet, lagjja Mati, në rregulloren komunale është ndarë në tri bashkësi lokale, të cilat Haradinaj, me seriozitetin e tij, do të angazhohet për funksionalizimin e bashkësive lokale, formimin, organizimin e këshillave të qytetarëve dhe ndërtimin e një qendre komunitare për të rinj e të moshuar.
Meqenëse kjo lagje është njëra ndër më të populluarat e Prishtinës, në programin e Haradinajt përfshihet edhe vënia e tabelave digjitale njoftuese dhe, për çdo kompleks banesor, nga një sallë për çështje komemorative.
Në mënyrë që Matit t’i kthehet qetësia dhe atraksioni, disa nga veprimet më të shpejta që Haradinaj paralajmëron që do t’i realizojë janë: ndriçimi i rrugëve anësore, vendosja e kamerave sipas sistemit CCTV, ndërtimi i një qendre sportive multifunksionale, si dhe krijimi i hapësirave të gjelbra me fushore rekreative.
Haradinaj. po ashtu zotohet se Qendra e Mjekësisë Familjare, MATI, duhet të jetë e hapur edhe ditëve të fundjavës, njëkohësisht me plotësim të domosdoshëm të saj me shërbime laboratorike, dentare, gjinekologjike etj.
Për Daut Haradinajn këto që u thanë janë lehtë realizueshme, vetëm duhet pasur vullnetin dhe guximin për të vepruar shpejt dhe arsyeshëm.
