Një skenë dhune në mes të rrugës “Adem Jashari” në Prizren, në korrik të vitit të kaluar, dyshohet se e vuri në lëvizje zyrtarin policor Halim Hamiti, ta ‘shpëtojë’ nga prangat të birin e tij, Rion Hamitin, i cili ishte i përfshirë në përleshje. Policia në Prizren e intervistoi të riun vetëm në cilësinë e dëshmitarit, përkundër që Rion Hamiti dha grushte dhe u përfshi në rrahje. Rastit i është dhënë epilogu me dënimin e personit që u arrestua dhe u akuzua për incidentin, teksa djali i policit ‘fitoi’.
Sinjalizues kanë bërë me dije se ndaj Rion Hamiti është kërkuar që të mos iniciohet rast, jo sepse nuk ka elemente të veprës penale, por, sipas tyre, për shkak se është djali i policit Halim Hamiti.
Ky i fundit po dyshohet se ndikoi në këtë rast, duke ndërhyrë që i biri të intervistohej si dëshmitar dhe jo si i dyshuar, pa e dëshmuar përfshirjen ose jo të tij në sherrin që plasi mes disa të rinjve më 16 korrik 2023.
Intervistimin e Rion Hamitit vetëm si dëshmitar lidhur me rastin e ka konfirmuar Prokuroria Themelore në Prizren.
Këta të fundit, kanë bërë me dije se kallëzimi penal është dërguar në Prokurori dhe “nuk janë kompetentë për t’u përgjigjur për rastin.’
“Me date 16 Korrik 2023, në rrugen “Adem Jashari”, Prizren eshte raportuar per në rast “Lëndim i lehte trupor” i njejti raste me Kallzim penal eshte derguar ne Prokurorin Themelore në Prizren. me date 24.07.2023, keshtu që nga ai moment nuk jemi kompetent te pergjigjemi per rastin , per informacione me detale ju lutem drejtohuni prokurorise.” – thuhet në përgjigjen e Policisë Rajonale në Prizren.
Nga Prokuroria kanë thënë se në kallëzim penal, Hamiti është intervistuar nga Policia në cilësinë e dëshmitarit dhe njëjtë është paraqitur edhe në kallëzim penal.
“Lidhur me kërkesën tuaj për informacione, Prokuroria Themelore në Prizren ju njofton se, personi me inicialet R.H., nga ana e policisë është intervistuar në cilësinë e dëshmitarit. Po ashtu, edhe në kallëzim penal është paraqitur si dëshmitar. Kallëzimi penal ka qenë kundër Z.H., ndërsa, i dëmtuar është B.J.”
Ndaj personit të vetëm të akuzuar për këtë rast, Zaim Haxhës, ky institucion ka njoftuar se kishte ngritur aktakuzë dhe lidhur me rastin i njëjti tashmë është shpallur fajtor dhe është dënuar nga Gjykata.
“Lidhur me rastin, Prokuroria Themelore në Prizren – Departamenti i Përgjithshëm, ka ngritur aktakuzë kundër Z.H., për shkak të dyshimit të bazuar se i njëjti ka kryer veprën penale “Lëndimi i lehtë trupor” nga neni 185, sipas Kodit Penal të Republikës së Kosovës (KPRK). Po ashtu, lidhur me rastin ka aktgjykim dënues ndaj të akuzuarit Z.H.”.
