Administrata e Biden po shkon drejt lejimit të Taipei të ndryshojë emrin e zyrës së saj përfaqësuese në Uashington për të përfshirë fjalën “Tajvan”, një veprim që ka të ngjarë të shkaktojë një përgjigje të zemëruar nga Pekini.
Njerëz të shumtë të informuar mbi diskutimet e brendshme amerikane thanë pwr “Financial Times” se Uashingtoni po shqyrtonte seriozisht një kërkesë nga Tajvani për të ndryshuar emrin e misionit të tij në kryeqytetin amerikan nga “Zyra Përfaqësuese Ekonomike dhe Kulturore Taipei” në “Zyra Përfaqësuese e Tajvanit”.
Kurt Campbell, këshilltari i Shtëpisë së Bardhë për Azinë, ka mbështetur ndryshimin, sipas dy personave me njohuri për diskutimet. Njëri tha për FT se kërkesa kishte mbështetje të gjerë brenda Këshillit të Sigurisë Kombëtare dhe zyrtarëve të departamentit të shtetit të Azisë.
Një vendim përfundimtar nuk është marrë dhe do të kërkonte që Presidenti Joe Biden të nënshkruante një urdhër ekzekutiv, thanë njerëzit të informuar për këtë çështje.
Qeveria amerikane dhe tajvaneze nuk komentuan kërkesën e Tajvanit. Por Ambasada kineze në Uashington tha se “kundërshton fuqishëm” çdo ndërveprim zyrtar amerikan me Tajvanin.
Në korrik, Tajvani hapi një zyrë në Lituani të quajtur “Zyra Përfaqësuese Taiwanese”. Ajo zemëroi Kinën, e cila tërhoqi ambasadorin e saj në Vilnius dhe i tha Lituanisë të tërhiqte ambasadorin e saj në Pekin.
Të enjten, Biden mbajti thirrjen e tij të dytë me udhëheqësin kinez Xi Jinping që kur u bë president në një përpjekje për të thyer një ngërç në marrëdhëniet kinezo-amerikane pasi takimet e mëparshme të nivelit të lartë prodhuan pak përparim.
Shtëpia e Bardhë tha se të dy udhëheqësit kishin një “diskutim të gjerë strategjik” dhe se Biden kishte “nënvizuar interesin e qëndrueshëm të Shteteve të Bashkuara për paqen, stabilitetin dhe prosperitetin në Indo-Paqësorin dhe botën”.
Tajvani është një burim tensioni midis dy fuqive. Një person i përfshirë në kërkesën për të ndryshuar emrin e misionit të Tajvanit në Uashington tha se Taipei diskutoi çështjen me SHBA në fund të administratës Trump, por i bëri një kërkesë zyrtare administratës Biden në mars. Një zyrtar i lartë tajvanez tha se Taipei kishte kërkuar ndryshimin për ca kohë.
