21 vjet më parë, forcat serbe, fillimisht kishin shtënë me armë zjarri në drejtim të më shumë se 50 anëtarëve të familjes Berisha, e më pas viktimat e të plagosurit i kishin bartur në një kafiteri, ku i kishin gjuajtur me bomba, për t’u siguruar se askush s’do të mbijetojë.
E tëra nisi kur te shtëpitë e kësaj familjeje, që nuk gjendet më larg se 100 metra nga stacioni policor i Suharekës, do të shfaqeshin paramilitarët serbë, që disa do t’i vrisnin në pragun e shtëpisë e të tjerët do t’i dëbonin nga shtëpia e tyre, duke i dërguar në lokalin e një kafiterie, ku edhe do të ndodhte masakra.
Nga kjo masakër kanë mbijetuar tre anëtarë të familjes, Vjollca Berisha me të birin, Gramozin dhe Shyhrete Berisha.
Në përkujtim të kësaj dite të tmerrshme për familjen Berisha, Gramoz Berisha dhe nëna e tij, Vjollca kanë përkujtuar më të dashurit e tyre në hyrje të lokalit ku 21 vjet më parë u vranë dhe u dogjën 52 familjarët e tyre.
Para pak vjetësh disa prej anëtarëve janë gjetur dhe janë varrosur eshtrat e Bujar Berishës, Faton Berishës, Nexhat Berishës dhe Arta Berishës, nën nderimet ushtarake. Por, ende nuk janë gjetur të gjithë anëtarët e familjes Berisha.
