Salih Tahiri, vëllai i kryetarit të Vushtrrisë, Xhafer Tahiri, është arrestuar sot gjatë ditës.
Lajmin për Gazetën Express e ka konfirmuar zëdhënësi i Policisë, Daut Hoxha.
“Sot, më 7 tetor, Njësia e Hetimeve të Krimeve Ekonomike dhe Korrupsionit në Mitrovicë ka arrestuar dy të dyshuar për përfshirje në veprën penale ‘ushtrim i ndikimit’. Me aktvendim të prokurorit, që të dy janë dërguar në mbajtje për 48 orë”, ka thënë Hoxha.
Arrestimi i Tahirit ka ardhur pasi Indeksonline është publikuar një video ku pretendohet se Tahiri kërkon ryshfet në këmbim të lejeve ndërtimore.
Kryetari i Vushtrrisë pas publikimit të videos, është distancuar duke thënë se do të bashkëpunojë me drejtësinë ndaj atyre që, sipas tij, i kanë shkelur besimin.
Po ashtu Tahiri ka thënë se PDK’ja për një vit ka provuar ta shantazhojë vazhdimisht me këtë video.
