Policia në Haiti ka arrestuar një person, që beson se është “i dyshuari kryesor” në organizimin e vrasjes së presidentit të Haitit, Jovenel Moise.
Policia tha se Christian Emmanuel Sanon, 63 vjeç, shtetas i Haitit, ka shkuar atje me avion privat në fillim të qershorit, për “motive politike”.
Shefi i policisë, Leon Charles, tha se plani fillestar ka qenë të arrestohet presidenti, por misioni pastaj ka ndryshuar, raporton Reuters.
Presidenti Moise, 53 vjeç, është vrarë në rezidencën e tij më 7 korrik.
Policia ka fajësuar më herët 28 mercenarë të huaj.
Gruaja e presidentit, Martine Moise, është plagosur në sulm dhe pastaj është dërguar për trajtim në SHBA.
Një delegacion i zyrtarëve të lartë të sigurisë dhe drejtësisë amerikane ka arritur të dielën në Haiti për të vlerësuar situatën e sigurisë.
Moise ka qenë president i Haitit që nga viti 2017.
Ai është përballur me akuza për korrupsion dhe është sfiduar nga disa protesta anti-qeveritare.
