Nga PZAP u theksua se për përfundimin e vendimmarrjes meritore lidhur me këto apele sot rreth orës 13:00 do të publikohet njoftimi për vendimin e PZAP-së.
“Kandidatët të cilët kanë apeluar vendimet e KQZ-së në PZAP do të njoftohen me kohë me vendime lidhur me apelet e parashtruara dhe kundër vendimeve të PZAP-së mund të paraqesin ankesë në Gjykatën Supreme të Kosovës brenda afatit ligjor prej 24 orëve nga moment I njoftimit të tyre me vendime, ndërsa Gjykata Supreme e Kosovës ka për obligim që të marrë vendime lidhur me ankesat brenda afatit ligjor prej 72 orëve që nga moment I paraqitjes së tyre në gjykatë”, thuhet tutje nga PZAP, transmeton lajmi.net.
Ndryshe vendimet e Gjykatës Supreme të Kosovës janë edhe përfundimtare.
Bujë të madhe së fundi bëri publikimi i disa video-incizimeve ku dyshohet për manipulim të votave nga bashkëshorti i kandidatës për deputete nga radhët e AAK-së, Meliza Haradinaj-Stublla.
Por Dardan Stublla, njohur ndryshe si bashkëshorti i kryediplomates së Kosovës deklaroi se një gjë e tillë është e inskenuar.
Komisioni Qendror Zgjedhor në një përgjigje të dhënë mbrëmë për lajmi.net bëri të ditur se janë të gatshëm për bashkëpunim me Prokurorinë lidhur me këtë çështje.
Njoftim i plotë nga PZAP:
Njoftim për vendimmarrjen e PZAP-it lidhur me apelet e paraqitura kundër vendimit të KQZ-së për shpalljen e rezultateve përfundimtare të Zgjedhjeve të Parakohshme për Kuvend të Kosovës të datës 14 shkurt 2021
Paneli Zgjedhor për Ankesa dhe Parashtresa – PZAP, njofton mediat dhe publikun se brenda afatit ligjor prej 72 orëve do të vendos lidhur me apelet e paraqitura nga kandidatet për deputet të subjekteve politike, kundër vendimit të KQZ-së Nr. 860 të datës 04.03.2021 me të cilin vendim në ora 11:25 ka shpallur Rezultatet përfundimtare të zgjedhjeve të Parakohshme për Kuvend të Kosovës të mbajtura me datën 14 shkurt 2021.
PZAP-i për përfundimin e vendimmarrjes meritore lidhur me këto apele sot rreth orës 13:00 do ti njoftoj mediat dhe opinionin publik përmes një njoftimi i cili do të publikohet në faqen zyrtare dhe facebook të PZAP-it.
Kandidatet të cilët kanë apeluar vendimet e KQZ-së në PZAP do të njoftohen me kohë me vendime lidhur me apelet e parashtruara dhe kundër vendimeve të PZAP-it mund të paraqesin ankesë në Gjykatën Supreme të Kosovës brenda afatit ligjor prej 24 orëve nga momenti i njoftimit te tyre me vendime, ndërsa Gjykata Supreme e Kosovës ka për obligim që të marrë vendime lidhur më ankesat brenda afatit ligjor prej 72 orëve nga momenti i paraqitjes së tyre ne Gjykatë.
