David Sassoli, presidenti i Parlamentit Evropian, ka thënë se shtetet e Ballkanit Perëndimor duhet të lejohen të anëtarësohen në Bashkimin Evropian pasi që, sipas tij, zgjerimi i bllokut do të ishte pozitiv për paqen dhe prosperitetin.
“Zgjerimi mund të sjellë përfitime të mëdha edhe për rajonin dhe Evropën, duke ndihmuar në stabilitetin, prosperitetin dhe paqen në kontinent”, ka thënë Sassoli.
Anëtarësimi sa më i shpejtë i këtyre vendeve në BE, sipas Sassolit, varet nga përmbushja e kritereve për anëtarësim nga këto shtete.
“Në secilin prej këtyre shteteve ende ka nevojë që të përmbushen reformat”, tha Sassoli, duke shtuar se “BE-ja duhet të mbajë premtimet e dhëna dhe të njohë përparimin e këtyre shteteve”, raporton gazeta gjermane, Funke Mediengruppe.
BE-ja tashmë është duke zhvilluar bisedime për anëtarësim me Malin e Zi dhe Serbinë, ndërkaq Shqipëria dhe Maqedonia e Veriut janë zyrtarisht shtete kandidate për anëtarësim. Muajin e kaluar, Maqedonia e Veriut mori mbështetje për nisjen e bisedimeve me BE-në nga Austria, Republika Çeke dhe Sllovenia.
Përderisa, Kosova dhe Bosnjë e Hercegovina konsiderohen si kandidate potenciale për nisjen e bisedimeve.
Procesi i zgjerimit të BE-së po përballet me sfida të mëdha, përfshirë edhe disa ndarje etnike në shtetet e Ballkanit Perëndimor. Në BE kërkohet votë unanime që të miratohet korniza negociuese për një shtet që aspiron të anëtarësohet në bllokun evropian.
Vitin e kaluar Bullgaria vendosi veto ndaj nisjes së bisedimeve për anëtarësimin e Maqedonisë së Veriut, për shkak të mosmarrëveshjeve mes Sofjes dhe Shkupit për gjuhën dhe historinë.
Bullgaria dëshiron që Shkupi ta pranojë se identiteti dhe gjuha kanë rrënjë bullgare dhe muajin e kaluar tha se nuk e ka në plan që ta heqë veton për nisjen e bisedimeve me Maqedoninë e Veriut.
