Një aksident trafiku mes dy veturave ka ndodhur rreth orës 10:30 në udhëkryqin e rrugëve “Ukshin Hoti” dhe “Robert Doll”, në Prishtinë, raporton Gazeta Sinjali.
Lajmin për Gazetën Sinjali e ka konfirmuar zëdhënësja e policisë për rajonin e Prishtinës, Flora Ahmeti, e cila tha se si pasojë e këtij aksidenti janë lënduar pesë persona.
“Në këtë aksident kanë qenë të përfshira dy automjete. Bazuar në të dhënat fillestare nga vendi i ngjarjes, pesë persona kanë pësuar lëndime trupore. Me rastin po merret njësiti i trafikut rrugor”, tha Ahmeti.
Një sinjalizues ka dërguar në adresë të Gazetës Sinjali fotografi nga vendi i ngjarjes.
Në këto pamje shihet se njëra nga veturat është rrokullisur në mes të rrugës, derisa disa zyrtarë policorë dhe qytetarët shihet se janë afruar te veturat për të ofruar ndihmë.
