Nëse Vetëvendosje dhe Lidhja Demokratike e Kosovës nuk arrijnë një marrëveshje rreth heqjes së taksës 100 përqind dhe mos vendosjen e reciprocitetit në asnjë mënyrë, atëherë zëvendëskryeministri Avdullah Hoti ka konfirmuar ditë më parë se do të largohet nga Qeveria Kurti.
Ndaj kësaj ka reaguar edhe nënkryetari i Lidhjes Demokratike të Kosovës, dhe njëherësh Ministër i Punëve të Brendshme, Agim Veliu.
Veliu ka dalë kundër propozimit të “shefit” të tij- kryeministrit Albin Kurtin për taksën 100 % ndaj mallrave serbe dhe se kjo taksë duhet të hiqet sa më parë.
“Ne si LDK e kemi dhënë qëndrimin tonë zyrtar. Pra, edhe unë jam që taksa të hiqet ashtu siç po e kërkojnë edhe miqtë tanë ndërkombëtarë- në këtë rast amerikanët, që taksa të hiqet e tëra”, tha Veliu për Gazeta Blic.
Veliu ka porositur po ashtu Kurtin që marrëdhënie ma SHBA’të të ruhet dhe të dëgjohen kërkesat e tyre në lidhje me taksën dhe dialogun me Serbinë.
Po ashtu ai ka paralajmëruar se struktura dhe kryesia e LDK-së shumë shpejt do të mblidhet për marrjen e vendime të tjera në lidhje me taksën nëse ajo nuk hiqet.
