Presidenti i Federatës së Futbollit të Kosovës, Agim Ademi, e ka sulmuar fizikisht një zyrtar të federatës sot pasdite.
Lajmi është konfirmuar për Telegraminsot nga zëdhënësja e Policisë së Kosovës, Flora Ahmeti.
“Rreth orës 14:00, kemi pranuar informatën për një rast sulmi, i cili ka ndodhë në zyrat e FFK-së. Lidhur me këtë rast aktualisht në stacion policor është duke u intervistuar pala ankuese. Për detaje njoftoheni me kohë”, tha Ahmeti për gazetën.
Telegramisot mëson se Ademi e ka sulmuar zyrtarin Artan Govori, pas një fjalosjeje me të duke e akuzuar se është mbështetës i kundërshtarit të tij në zgjedhjet për president të shtëpisë së futbollit, Gramoz Vokrri.
Sulmi ka ndodhur brenda zyrës së federatës dhe Policia ka dalë në vendin e ngjarjes.
Govori, i cili është drejtor për marrëdhënie me jashtë në FFK, ka shkuar në stacionin policor për të dhënë deklaratë.
Gramozi, i biri i legjendës së futbollit shqiptar dhe ish-presidentit të FFK-së Fadil Vokrri, e ka zyrtarizuar sot kandidaturën për president të federatës së futbollit duke i dorëzuar nënshkrimet e nevojshme të delegatëve për këtë.
Sulmi ka ndodhur vetëm pak kohë pasi Vokrri ishte në federatë për t’i dorëzuar nënshkrimet e delegatëve në garën për president.
Kjo nuk është hera e parë që Ademi – i cili është në kërkim të një mandati të dytë katërvjeçar në krye të FFK-së – që i sulmon zyrtarët e federatës.
Ai e ka një histori sulmesh ndaj zyrtarëve të institucionit që e udhëheq që prej vitit 2018. Më 2019, ai e kishte sulmuar mjekun e kombëtares, Mehmet Maxhuni, në Parkun e Gërmisë në kryeqytet.
Ishte raportuar po ashtu për dy sulme të tij ndaj sekretarit të përgjithshëm të FFK-së, Erol Salihu, të cilin e kishte shkarkuar nga posti më vonë në vitin 2021.
Vetëm katër muaj më parë, Ademi ishte ankuar në polici për një sulm ndaj tij në Parkun e Gërmisë.
Sulmi i fundit i Ademit vjen në një kohë rrëmuje në shtëpinë e futbollit të Kosovës në prag të zgjedhjeve presidenciale. Sulmet e tij ndaj zyrtarëve të federatës nuk janë telashi i vetëm me ligjin që ai do të përballet.
Ai është në rigjykim për veprën penale detyrim në tentativë dhe nën hetime për dyshimet se e ka kurdisur një ndeshje të Kombëtares U21 të Kosovës.
Për më tepër, vendimi i FFK-së për të thirrur zgjedhje të reja pa ndonjë arsye ligjore, duke qenë se Ademit nuk i mbaron mandati katërvjeçar deri në korrik, ka shkaktuar shumë polemika në vend. Kjo po shihet si një përpjekje dëshpëruese e Ademit për ta ruajtur postin deri më 2026.
Më 2 mars, FFK-ja i shpalli zgjedhjet e reja për 6 prill, duke iu dhënë kandidatëve të mundshëm jo më shumë se një muaj kohë për t’i përgatitet programet e tyre.
Pretendohet se me këtë, ajo e ka shkelur Nenin 39 të Statutit të federatës, i cili thekson se kuvendi zgjedhor për emërimin e presidentit të FFK-së duhet të thirret dy muaj më herët.
