Agjencia për Administrimin e Pasurisë së Konfiskuar dhe Sekuestruar funksionon në kuadër të Ministrisë së Drejtësisë dhe bashkëpunon me organet e drejtësisë, në mënyrë që ta luftojë krimin e organizuar dhe korrupsionin në Kosovë.
Konfiskimi nënkupton marrjen e përhershme të pasurisë sipas urdhrit të formës së prerë nga gjykata kompetente apo organi tjetër kompetent në pajtim me ligjin në fuqi, kurse sekuestrimi nënkupton marrjen e pasurisë nga organi kompetent deri në vendimin e prerë të gjykatës.
Ardian Bajraktari, ushtrues i detyrës së sekretarit të përgjithshëm të Ministrisë së Drejtësisë, tha për Radion Evropa e Lirë se veç aseteve që janë në depon e agjencisë, ka edhe shtëpi e banesa të cilat janë të sekuestruara edhe konfiskuara, e që janë nën mbikëqyrjen e agjencisë, por edhe një sasi e arit e cila ruhet nga Banka Qendrore.
Çka ndodh me pasurinë e konfiskuar?
Agjencia po ashtu bën vlerësimin e pasurisë së konfiskuar dhe sekuestruar dhe pas një vendimit të prerë nga gjykata, mundëson shitjen e saj.
“Ankandet dalin për pasuritë të cilat janë të konfiskuara me vendim të plotfuqishëm të gjykatës. Ndërsa, kur pasuria është e ngrirë ose e sekuestruar, ato vetëm administrohen nga ana e agjencisë”, tha Bajraktari.
Shumë nga informacionet të cilat dërgohen në prokurori si raste të dyshuar për pasuri të fituar në mënyrë jo të ligjshme, janë nga Agjencia Kundër Korrupsionit, e cila është agjenci e pavarur.
