Deputetja e PDK-së, Ariana Musliu-Shoshi sot në seancën e Kuvendit të Kosovës, e ka pyetur kryeministrin Albin Kurti për investimin e Serbisë në Universitetin e Mitrovicës së Veriut.
Ajo e ka pyetur Kurtin nëse Ministria e Infrastrukturës ka dhënë leje për investimet aty.
Në përgjigjen e tij, kryeministri Kurti ka thënë se Universiteti në Mitrovicën e Veriut nuk është legjitim dhe Ligji për Arsimin parasheh statut të veçantë për këtë universitet.
“Nuk ka dyshim që funksionimi i këtij universiteti nuk është legjitim pasi nuk ka hartuar një statut në përputhje me Ligjin e Arsimti dhe nuk është akredituar. Ky universitet nuk financohet nga Republika e Kosovës. Askush nuk duhet të ketë dyshim që shtetit ynë nuk ka mekanizma për të ndaluar aktivitetet e paligjshme. Si shenjë e vullnetit të mirë e ka miratuar rregulloren të datës 30 dhjetor 2015 përmes të cilës shtetasve që kanë mbaruar në këtë universitet u njihet diploma. Siç e dini Ligji për Arsimin parasheh status të veçantë për Universitetin në komunën e Mitrovicës së Veriut, ky Universitet menaxhohet nga komuna dhe për këtë nuk kërkohet pëlqim nga dikush tjetër. Projektligji për Arsimin është miratuar në vitin 2008, shpejtësia me të cilën koalicioni i atëhershëm PDK dhe LDK e ka menaxhuar atë proces më bën mua të përgjigjem shkurt në pyetje tuaj”, ka thënë ai.
