Intervista e një 25-vjeçareje që kishte 4 vite që punonte si prostitutë, ka hapur debate në studion e emisionit “Shqipëria Live”. Xhemi e cila ishte nënë e dy fëmijëve dhe e divorcuar, si pasojë e gjendjes së keqe ekonomike, ka vendosur që të nisë si prostitutë.
I ftuar në studio për të folur në lidhje me a duhet të legalizohet prostitucioni në Shqipëri, ishte pastori i njohur, Akil Pano.
Duke iu referuar së resë, Pano tha se ajo është e pafuqishme për të ndryshuar jetën e saj. Sipas tij, ajo nuk ka njohur as institucionet në qytetin e saj për ta nxjerrë nga mjerimi i saj.
“Nuk është një punë si çdo punë tjetër. E ka zgjedhur si një punë për momentin. Kur hy brenda këtij rrethi është vicioz, dhe e ke të vështirë që të dalësh. Duhet dikush tjetër të të ndihmojë që të dalësh prej aty”, tha pastori.
A duhet legalizuar prostitucioni? Pastori i njohur: Është faj, e dua
Sipas tij, 25-vjeçarja mund të mos zgjidhte prostitucionin për arsye nevoje. “Ka shumë gra të divorcuara, por bëjnë 2-3 punë të ndryshme për të fituar para, e nuk kanë zgjedhur prostitucionin”, shtoi Pano.
Sipas tij, si moralisht ashtu edhe nga ligji, prostitucioni është faj, është dhimbje. “Në dimensionin moral, është faj edhe në ligj është faj. Por nuk duhet a themi në një mënyrë që ta godasim këtë vajzë, por ta ndihmojmë”, tha pastori.
Më pas Pano tha se nuk do të kishte prostituta nëse nuk do të kishte një person që shkon tek ato. “Nuk do të ekzistonin ato nëse nuk do të ishin shkelësit e shtratit martesor, në këtë rast burrat”, shtoi ai.
Ndërsa duke folur në lidhje me legalizimin e prostitucionit, pastori tha se një gjë e till nxiti trafikimin e qenieve njerëzore nga vendet e tjera.
“Nga një raport kërkimor rezulton se 87 për qind e vajzave që bënin punën e prostitucionit, donin të largoheshin, 54% dëshmonin se mbi to ishte shtruar dhunë fizike dhe psikologjike, 70% ishin përdhunuar. Mund ta bësh punën nën petkun e ligjit, por nuk e shpëton prostitutën. Rrit urinë dhe kërkesën e një popullate për të marrë shërbime”, tha pastori.
Ndërsa duke menduar për të ardhmen e fëmijëve, Pano tha se në “vitin 2030 e sheh vendin në një dimension me më pak prostituta”. “Më rezulton se nga vendet që e kanë legalizuar, është rritur kërkesa e zanatit të prostitutës. Unë nuk e dua Tiranën me më shumë shtëpi publike”, përfundoi ai.
