Gjashtë ditë pas mbajtjes së zgjedhjeve të jashtëzakonshme parlamentare dhe daljen e rezultateve preliminare, ende nuk dihet se kur do të përfundojë numërimi i votave të diasporës dhe atyre me kusht, në mënyrë që të certifikohet rezultati, shkruan Gazeta Sinjali.
Ndonëse ende nuk dihet as kur do të formohet Qeveria, Kosova do të përballet me një tjetër sfidë – atë të zgjedhjes së presidentit.
Që nga nëntori i vitit të kaluar, me dorëheqjen e presidentit të atëhershëm, Hashim Thaçit, postin e U.D presidentes e mban Vjosa Osmani, njëherësh kandidate për presidente nga koalicioni fitues VV-Lista Vjosa.
Të pyetur se a do t’ia sigurojnë kuorumin e mjaftueshëm dhe a do ta votojnë ish-kandidaten e tyre për kryeministre, nga LDK-ja kanë thënë se kjo nuk është temë.
“Ne nuk kemi vendosë kurrgjo. Ne kemi vendosë me shku në Kuvend e me zgjedh kryetarin e LDK-së. Për këtë, mu më merr në qafë me më bo pyetje”, ka thënë shkurt për Sinjalin nënkryetari i dorëhequr i LDK-së, Haki Rugova.
Ndryshe, gjatë ditës së djeshme ishte kandidati për kryetar të LDK-së, Anton Quni që tha se e kishte ftuar Osmanin të kthehej në LDK dhe se i kishte thënë se mjafton një “po” për t’u kthyer.
