Hamasi ka thënë se do të refuzojë të çarmatoset nëse nuk krijohet një shtet i pavarur palestinez me kryeqytet Jerusalemin.
Grupi terrorist palestinez tha në një deklaratë të shtunën se “rezistenca e tij e armatosur… nuk mund të braktiset përveçse nëpërmjet rivendosjes së plotë të të drejtave tona kombëtare, kryesisht midis tyre krijimi i një shteti palestinez të pavarur dhe plotësisht sovran me kryeqytet Jerusalemin”.
Kjo vjen pasi disa shtete arabe i bënë thirrje Hamasit të shpërbëhet dhe të çarmatoset mes shtytjes globale për një shtet palestinez dhe për t’i dhënë fund luftës në Gaza. Deklarata u nënshkrua gjithashtu nga të 27 shtetet e Bashkimit Evropian, si dhe nga 17 vende të tjera, përfshirë Britaninë.
Mbretëria e Bashkuar, Franca dhe Kanadaja janë zotuar të njohin Palestinën në Asamblenë e Përgjithshme të Kombeve të Bashkuara në shtator. Kryeministri britanik, Sir Keir Starmer, tha se ky hap do të ndërmerret muajin tjetër nëse Izraeli nuk përmbush një sërë kushtesh, duke përfshirë përfundimin e situatës “të tmerrshme” në Gaza, raporton “The Telegraph”, transmeton Periskopi.
Por ai u kritikua për dështimin për të vendosur ndonjë kusht ndaj Hamasit, duke përfshirë lirimin e 50 pengjeve të mbetura.
Starmer u paralajmërua gjithashtu të shtunën se njohja e një shteti palestinez do të “destabilizonte” rendin ligjor ndërkombëtar.
Në një opinion të ri ligjor të parë nga “The Telegraph” dhe të përcjellë edhe te Kryeministri britanik, Prokurori i tij i Përgjithshëm, Lord Hermer dhe dhjetëra deputetë me ndikim të Partisë Laburiste, paralajmëruan se plani i njohjes “do të krijonte një precedent problematik dhe mund të sfidonte dhe në fund të fundit të destabilizonte një sistem ndërkombëtar të bazuar në një kuptim të përbashkët të asaj që do të thotë të jesh shtet”.
Ndërsa Hamasi më parë ka bërë thirrje për një shtet palestinez, ai parashikon një shtet islamik në të gjithë Izraelin e sotëm, të cilin nuk e njeh. Ai nuk mbështet një zgjidhje me dy shtete, e cila propozon krijimin e dy shteteve në territorin e ish-Palestinës së Mandatuar.
Negociatat indirekte midis Hamasit dhe Izraelit që synonin sigurimin e një armëpushimi 60-ditor në luftën e Gazës dhe një marrëveshje për lirimin e pengjeve përfunduan pa zgjidhje javën e kaluar.
