Ish-këshilltari i Behgjet Pacollit, Naim Murseli raportohet është arrestuar nga Policia e Kosovës nën dyshimet për vrasjen e gruas së tij Liridona Murseli.
Gruaja 30 vjeçare u vra të mërkurën në një fshat në periferi të Prishtinës, derisa sipas dëshmisë së parë të burrit të saj – tashmë i arrestuar si i dyshuar – gjoja ekzekutuesit ishin dy grabitës që e ndalen veturën me të cilën po lëviznin çifti dhe dy fëmijët e tyre.
Përveç Murselit, policia ka njoftuar edhe për një të arrestuar tjetër të dytë si i dyshuar për vrasjen e Liridona Murselit, e cila kishte edhe shtetësi të Suedisë.
Arrestimi u krye në Gjakovë. Rasti tashmë po hetohet si vrasje me armë zjarri.
“Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar. Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë”, thuhet në njoftimin e përditësuar nga Policia e Kosovës.
Derisa menjëherë pas tragjedisë Policia e kishte njoftuar rastin si “grabitje me pasoja të vrasjes”.
Liridona Murseli u varros sot në fshatin Cermjan të Gjakovës. Në varrimin e saj mori pjesë edhe i dyshuari Naim Murseli, i cili si bashkëshort i viktimës pranoi ngushëllimet e pjesëmarrësve në ceremoninë mortore.