Mungesën e dakordimit mes Qeverisë dhe NJSI-së po e shohin shqetësues ekspertë të sigurisë në Kosovë. Sipas tyre Qeveria është sjellë me injorancë dhe ka qenë sabotuese ndaj njësive elitare. Këto të fundit u janë kthyer planeve për të kundërshtuar mospranimin e kërkesave të tyre.
“Do t’i takojë, por atë që kam pasur e kam thënë”, kishte deklaruar shefi i Qeverisë kur ishte pyetur për kërkesat e dy prej njësive më elite të Policisë, që më 1 nëntor ia zunë derën me protestë.
Dhe vërtetë ashtu doli. I takoi, por asnjë gjë nuk ndryshoi.
Asnjë dakordim nuk u arrit në takimin gati tre orësh të mërkurën mes kryeministrit dhe zëvendësdrejtorit të policisë dhe përfaqësuesve të NJSI-së dhe NJTME-së.
Bile mëngjesin e parë pas takimit, Qeveria miratoi shtesat e rrezikshmërisë prej 150 eurosh, pa e rritur vlerën e tyre.
Burime të televizionit Dukagjini brenda Njësisë Speciale Intervenuese bëjnë me dije se protesta e fillim nëntorit nuk do të jetë e fundit, pasi e njëjta po planifikohet të përsëritet së shpejti.
Këtë qasje të Qeverisë, ish-zëvendësministri i Brendshëm, Valdet Hoxha, e vlerëson injorancë totale ndaj triumfuesve të Banjskës.
“Mos arritja e një marrëveshje mes Qeverisë dhe NJSI-së ishte i paragjykuar që të dështojë, nga vetë deklarimi i Kurtit se 150 euro nuk janë pak, ai ishte vendim paraprak për ta refuzuar kërkesën e kësaj njësie dhe si pasojë kemi dështimin e këtyre bisedimeve, pra është një injorancë totale nga ana e Qeverisë së Kosovës që do ti ketë pasojat e veta”, ka thënë Hoxha.
Përveç në shtesa, eksperti i sigurisë Drizan Shala vlerëson se Qeveria edhe ne buxhetin e vitit të ardhshëm e ka sabotuar këtë institucion të sigurisë.
“Tashmë Qeveria është e betonizuar sa i përket qëndrimit të vetë për shtesat e rrezikshmërisë, për pjesën e sigurisë, pra nuk do të ketë lëkundje as rritje as zvogëlim të shtesave, dhe kjo është një mesazh për komplet policinë e Kosovës se kjo qeveri nuk e ka në plan të parë, mirëqenien e zyrtarëve policorë, bazuar në projektbuxhetin mund të thuhet se buxheti për strukturën e sigurisë është buxhet sabotues nga ana e qeverisë Kurti dhe kështu tenton ti mbajë të kontrolluar nga ana e aspektit financiar”, ka thënë Shala.
Këto dy njësi pezulluan protestën e 7 nëntorit pas premtimit të Kurtit për t’i takuar përfaqësuesit e tyre.
