Kryetari i Lidhjes Demokratike të Kosovës (LDK), Isa Mustafa, duket se nuk i ka marrëdhëniet e mira me bashkëpartiakun e tij, Ukë Rugovën, djalin e Ish-Presidentit historik të Kosovës, Ibrahim Rugovën, shkruan Gazeta Insajderi.
Mustafa përmes Facebook ka thënë se “ata të aferës së pasaportave duhet të shkojnë në lavazh, të pastrohen mirë, brenda e jashtë”, ndërsa njëri nga akterët e kësaj afere, ishte vetë Ukë Rugova.
Kohë më parë, Ambasada Amerikane në Kosovë kishte vendosur t’i pezullojë disa persona zyrtarë vizat për në SHBA-në. Aty i përfshirë ishte Ukë Rugova, i njohur për aferën me viza italiane.
Gazeta Insajderi para tre vjetësh kishte publikuar hulumtimin “Dosja Grande“, që tregojnë për veprimet e dyshimta të biznesit, ku ishte aksionar ish-deputeti dhe djali i presidentit Rugova, Ukë Rugova.
Insajderi kishte siguruar raportet e hetuesve të Njësisë për Hetimin e Krimit të Organizuar, e cila operon në kuadër të EULEX-it. Raportet tregojnë për dyshimet se biznesi i Ukë Rugovës ishte i përfshirë në pastrim të parave.
Raportet janë pjesë e dosjes “Grande”, ku Ukë Rugova dhe nëntëmbëdhjetë të tjerë akuzohen për përfshirje në biznesin e shitjes së vizave italiane.
Më 16 maj të vitit 2016-të, Prokuroria Speciale e Kosovës kishte ngritur aktakuzë ndaj tij ndërsa ai akuzohej se ka drejtuar e mbikëqyrur një grup kriminal që përfitonte shuma të mëdha parash nga njerëzit që kishin nevojë të pajiseshin me Viza Shengen.
Të gjitha këto viza supozohet se janë marrë në mënyrë të paligjshme nëpërmjet shtrembërimit apo korrupsionit. Aplikacionet që ishin gjetur në rezidencën e ish-presidentit Ibrahim Rugova, korrespondojnë me të dhënat personale të 300 personave që janë nxjerrë nga e-mailin i të akuzuarit tjetër, Visar Beqiri.
“Aplikacionet duke filluar nga kjo datë janë gjetur në vendbanimin e tij. Sasia e dokumenteve që lidhen me aplikacionet për viza italiane të gjetura gjatë bastisjes dhe në kompjuterët e tij ishte e madhe”, thuhej në aktakuzë.
Prokuroria i theksonte provat e marra nga autoritetet italiane të cilat tregojnë se të paktën 614 aplikime për vizë lidhen me Ukë Rugovën.
“Nga letrat për kërkesë të vizës dhe letërgarancitë personale, emrat e të paktën edhe 397 personave mund të identifikohen për të cilët së paku ka pasur përgatitje për të aplikuar për viza të ndërmarrë nga Ukë Rugova”, thuhej tutje.
Ditë më parë, gjatë kuvendit zgjedhor të LDK-së, Isa Mustafa, e ka bërë anëtar të Këshillit të Përgjithshëm Ukë Rugovën ndërsa ky i fundit, para rizgjedhjes së Mustafës, kishte thënë se nuk ka kandidat të preferuar për në krye të LDK-së.
Isa Mustafa sot është takuar me liderin e VV-së, Albin Kurtin, me të cilin ka diskutuar për një koalicion mes partive të tyre në zgjedhjet e parakohshme nacionale.
