Ish-komandanti i UÇK-së Nuredin Ibishi, dy ditë më pare u ftua nga Gjykata Speciale.
Ai ka dhënë detaje rreth ftesës që i është bërë nga Specialja, duke thënë se është ftuar në cilësinë e dëshmitarit.
“Jam ftuar në cilësi të dëshmitarit. Pjestarët e UÇK-së i janë përgjigjur ftesave si të drejtësisë vendore ashtu edhe asaj ndërkombëtare. Në Hagë jam ftuar të intervistuar në mesin e muajit të ardhshëm, më 14 nëntor”, ka thënë Ibishi
Por ai thotë se po bëhet drejtësi selektive.
“Duhet të ketë një epilog, po përsëristet e njëjta gjë. Drejtësia selektive po vazhdon”, ka thënë Ibishi.
Lidhur me këtë ftesë, ish-komandanti i njohur me nofkën Leka, dy ditë më parë kishte shkruar edhe përmes Facebookut, por nuk kishte treguar datën se kur do të invervistohet nga Haga, përveç që kishte shkruar se në mesin e muajit nëntor.
“Të nderuar bashkëluftëtarë, qytetarë, miq dhe familjarë,
Ju njoftoj se kam pranuar ftesë për intervistim nga Gjykata Speciale në Hagë .
Ky intervistim do të bëhet në mesin e muajit Nentor 2019. Si në shumë procese të deritashme, unë dhe bashkëluftëtarët e mi do të deshmojmë se Lufta e Ushtrisë Çlirimtare të Kosovës ka qenë e drejtë dhe dhe do mbetet e tillë. Ashtu siç e zhvilluam luften për liri dhe triumfuam falë mbështetjes së popullit të Kosovës dhe ndihmës së Aleancës Ndërkombëtare të prira nga SHBA edhe kësaj radhe do të dalim faqebardhë. Faleminderit për mbēshtetjen e vazhdueshme!”, kishte shkruar Ibishi.
Historiku i Gjykatës Speciale
Gjykata Speciale ishte miratuar më 3 gusht të vitit 2015 në Kuvendin e Kosovës, pas kërkesave të shumta nga ndërkombëtarët.
Me 82 vota për, 5 kundër dhe 1 abstenim, deputetët e asaj legjislature i kishin votuar ndryshimet e nevojshme kushtetuese të cilat i kishin hapur rrugë themelimit të kësaj gjykate të kërkuar nga bashkësia ndërkombëtare.
Në atë kohë, kryeministër kishte qenë Isa Mustafa, ndërsa zëvendëskryeministër Hashim Thaçi. Ky i fundit kishte qenë shumë i zëshëm në mbështetjen
e krijimit të kësaj Gjykate.
Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.
Ajo ka filluar punën muajve të fundit, kur ka ftuar disa ish figura të larta të Ushtrisë Çlirimtare të Kosovës.
Lëvizja Vetëvendosje kishte qenë partia e vetme e cila unanimisht kishte votuar kundër krijimit të kësaj Gjykate, ndërsa nga partitë e tjera ka pasur disa figura të pakta që kanë votuar kundër.
Në dhjetor të 2017-tës një grup deputetësh të Kuvendit të Kosovës kishin një përpjekje për të zhbërë Gjykatën Speciale përmes shfuqizimit të Ligjit për Dhomat e Specializuara, por dështuan, për faktin se Kryesia e Kuvendit të Kosovës, në dy tentime nuk arriti të siguronte kuorum për të thirrur një seancë të jashtëzakonshme.
