Sot, Tajvani nisi një platformë të re të transmetimit të lajmeve dhe mediave në gjuhën angleze, duke synuar t’i japë vetes një zë më të madh në skenën botërore dhe të informojë atë për “masat shtrënguese” të Pekinit ndaj ishullit të pretenduar kinez.
Taiwan+, me një fond prej 28 milionë dollarësh amerikanë (financim qeveritar), do të transmetojë përmbajtje në internet, duke u fokusuar në lajme, si dhe veçori për Tajvanin, nga ushqimi dhe turizmi deri në kulturë e teknologji.
Presidentja Tsai Ing-wen, në një mesazh të regjistruar për festën e kësaj iniciative në një muze të Taipeit, tha se Tajvanit i duhej një platformë për të nxjerrë në pah para botës diversitetin e ishullit, arritjet demokratike dhe aspiratën për të kontribuuar në bashkësinë ndërkombëtare.
“Kjo është platforma jonë ndërkombëtare e mediave-një pjesë kryesore e përpjekjes sonë kolektive për të demonstruar atë që Tajvani ka për të ofruar,” tha ajo.
Themelimi i Taiwan+ vjen në një kohë kur Kina është gjithnjë e më aktive në mediat në gjuhën angleze, duke i paraqitur pikëpamjet e Partisë Komuniste në pushtet për audiencat e huaja, veçanërisht nëpërmjet kanalit të lajmeve të televizionit shtetëror në gjuhën angleze, China Global Television Network, ose CGTN.
Kina, gjithashtu po shtrëngon hapësirën ndërkombëtare të Tajvanit, duke përfshirë detyrimin e kompanive të huaja që t’i referohen atij si pjesë e Kinës në faqet e tyre të internetit dhe duke kryer në mënyrë rutinore stërvitje ushtarake pranë ishullit.
Kryetari i parlamentit, You Si-kun, tha se Tajvani duhet të tregojë historitë e veta dhe të përballet me keqkuptimet e krijuara nga Kina.
“Për një kohë të gjatë, komunistët kinezë kanë tkurrur hapësirën ndërkombëtare të Tajvanit dhe kanë krijuar një imazh të rremë të Tajvanit, duke çuar në sfidat diplomatike me të cilat Tajvani po përballet tani”, tha ai.
“Megjithatë, vitet e fundit ka pasur një ndryshim dramatik në mënyrën se si bota i sheh komunistët kinezë. Demokracitë kryesore në të gjithë botën tani po japin alarmin për ngritjen e Kinës”, shtoi ai.
Tajvani tashmë ka shumë pak media vendase në gjuhën angleze, më e spikatura prej të cilave është Taipei Times, e themeluar në vitin 1999 dhe e botuar nga në mënyrë masive nga “Liberty Times”.
