Presidenti i Serbisë, Aleksandar Vuçiq, nuk ka pranuar ta komentojë vizitën e ish-komandantit të Forcave Aleate të NATO-s, gjeneralit amerikan Wesley Clark, në bazën e Forcës së Sigurisë së Kosovës në Prishtinë.
Megjithatë ai ka shfytëzuar rastin që të komentojë FSK-në.
“Ata kanë pushtet faktik në terren dhe po i ngacmojnë serbët, por nëse më thoni që ata do të bëjnë një ushtri të fortë, ajo është aq e dobët në raport me ne. Ata kanë burime njerëzore dhe asgjë më shumë”, ka thënë Vuçiq, përcjell b92.
Ai ka folur edhe rreth rezolutës për dënimin e gjenocidit në Srebrenicë, që është votuar sot në Kuvendin e Kosovës.
Gjithashtu, Vuçiq ka thënë se kjo është pasojë e nismës së mëhershme që ka ndërmarrë Mali i Zi me miratimin e një rezolute të tillë.
“E vetmja gjë që më habit në këtë drejtim është se Podgorica ishte më e zellshme se Prishtina”, shtoi presidenti serb.
Serbia nuk pranon se ka pasur gjenocid në Srebrenicë, ku më 11 korrik 1995 u vranë mbi 8.000 burra myslimanë të paarmatosur dhe nuk pranon rolin e saj në këtë krim, më të madhin në Evropë pas Luftës së Dytë Botërore.
