Lëvizja Vetëvendosje që aktualisht është në pushtet, ka postuar në rrjetin social Facebook disa nga prioritetet e Qeverisë Kurti 2 në aspektin e punësimit në Kosovë.
Siç kanë bërë të ditur në Facebook, kjo Qeveri si masë në kuadër të ringjalljes ekonomike ka ndarë 50 milionë euro për çështjen e punësimit.
Po ashtu, 10 milionë euro qeveria do t’i ndajë për të gjithë ata dhe ato që kanë humbur vendin e tyre të punës përgjatë periudhës mars 2020 − prill 2021.
“Për çdo të ri të punësuar qeveria do ta subvencionoj pagën në 3 muajt e parë në vlerë prej 170 euro në muaj.”
Tutje, 10 milionë euro qeveria do t’i ndajë për mbështetjen e secilit të punësuar të ri që nuk ka qenë i punësuar në 3 muajt e fundit e që deklarohet në ATK.
Në njoftim thuhet se secilit prej tyre do t’iu paguhen kontributet pensionale në vlerë prej 10% të pagës për 12 muaj me radhë.
