Nga Qeveria e Kosovës kanë reaguar sërish rreth liturgjisë së mbajtur ditën e djeshme në kishën serbe të papërfunduar e cila gjendet në kampusin e Universitetit të Prishtinës dhe që u ndërtua gjatë viteve të okupimit serb,
Luan Dalipi, shef i stafit të kryeministrit ka shkruar se përmes liturgjisë, synimi i qeverisë serbe ishte të provokonte situatën dhe destabilizonte Kosovën.
Dalipi në Twitter ka shkruar se Serbia duhet të përballet me të kaluarën e saj dhe ta hapë një kapitull të ri me Kosovën, duke ia njohur shtetësinë.
“Kosova është krenare për tolerancën e saj fetare ndaj të gjitha besimeve, praktikuar çdo ditë në të gjithë tokat e saj. Synimi i qeverisë së Serbisë është të provokojë përmes kishës serbe ortodokse duke mbajtur një liturgji brenda Universitetit të Prishtinës (UP), mbi një strukturë të papërfunduar”.
“Ajo strukturë u ndërtua me forcë gjatë regjimit të Millosheviqit dhe fushatës gjenocidale, dhe pasi të gjithë studentët dhe pedagogët shqiptarë u dëbuan nga UP-ja dhe qindra shkolla të mesme në të gjithë Kosovën”.
“Teksa kombet demokratike përfshihen në debate të fuqishme dhe kërkime serioze të shpirtit rreth monumenteve që glorifikojnë shtypjen, Serbia përdor reliket e së kaluarës së saj të errët në një përpjekje për të destabilizuar vendin që pushtoi dhe shtypi brutalisht për një shekull, duke arritur kulmin në gjenocid”.
“Ne e nxisim qeverinë serbe të përballet me të kaluarën e saj, në vend se të përpiqet të avancojë agjendat e saj politike nën petkun e besimit. Mesazhi ynë për ta është që të ndalojnë së qari rrejshëm, të pushojnë së trazuari dhe në vend të kësaj të përqendrohen në hapjen e një kapitulli të ri të paqes duke njohur shtetësinë e Kosovës”
“Ne falënderojmë qytetarët tanë për shfaqjen e pjekurisë duke ruajtur qetësinë dhe duke shmangur provokimet e tilla.”, ka shkruar Dalipi
