Drejtori i të ashtuquajturës Zyrë për Kosovë në kuadër të Qeverisë së Serbisë, Petar Petkoviq, ka thënë se kryeministri i Kosovës, Albin Kurti, dëshiron që t’i paraqesë kishat dhe manastiret serbe si trashëgimi shqiptare.
Petkoviq e ka quajtur këtë hipokrizi dhe sipas tij është një tentim për të mashtruar bashkësinë ndërkombëtare.
“Ajo që ai po thotë është se i sheh kishat dhe manastiret ekskluzivisht në kontekstin e historisë shqiptare dhe shqiptarizimit të thesarit tonë kulturor. Kemi mundur ta shohim edhe kur urojë Pashkët për besimtarët ortodoksë, kur ai tha “me dashuri për vendin tonë dhe gjuhën tonë”. Të gjithë do të mendonin se është në rregull, por në fakt ai e citoi Nolin, që është themelues i Kishës Ortodokse Shqiptare”, tha Petkoviq për RTS-në, duke shtuar se Kurti nuk e ka qëllim të vërtetë mbrojtjen e kishave dhe manastireve serbe, por t’i paraqesë si trashëgimi kulturore të Kosovës.
Petkoviq ka thënë se Kosova do ta prishë dialogun në momentin kur kërkon anëtarësim në UNESCO e Interpol. Ai ka akuzuar autoritetet e Kosovës se nuk janë në gjendje të zbatojnë vendimet e tyre.
“Ata nuk janë në gjendje të zbatojnë as vendimet e tyre. Kemi parë disa herë që ata anuluan takimet në Bruksel. Ne jemi të gatshëm të flasim, sepse është e qartë se mund t’i zgjidhim çështjet e diskutueshme shekullore vetëm në tryezën e bisedimeve, me dialog dhe zgjidhje kompromisi. Kur Kurti flet se si do ta mbrojë Deçanin e Graçanicën, është e qartë se është hipokrizi, sepse ata nuk janë në gjendje të zbatojnë vendimet e tyre. Dy ditë më parë u bënë pesë vjet që kur e ashtuquajtura Gjykatë Kushtetuese e Kosovës vendosi t’i kthehen 24 hektarë tokë që i përket Manastirit të Deçanit dhe ai vendim nuk zbatohet nga kadastri lokal ose i ashtuquajturi kadastër qendror në Prishtinë, sepse të fuqishmit nuk e duan këtë. Kur Kurti thotë se Prishtina ka dëshirë dhe se di t’i ruajë kishat serbe, unë dua të kujtojë se që nga viti 1999 janë djegur e shkatërruar 135 kisha e manastire”, tha Petkoviq.
Ai shtoi se nga dita e hënën qytetarët serbë të Kosovës do të mund të marrin ndihmë financiare nga Serbia, nëpërmjet një pako ekonomike.
Të gjithë të papunët do të marrin nga 200 euro, ndërsa të punësuarit, fëmijët dhe pensionistët nga 100 euro.
