Agjencia Federale amerikane “DEA” që bën hetimin dhe luftimin e shpërndarjes së drogës ka konfirmuar pjesëmarrjen në operacionin që rezultoi me kapjen e 400 kilogramëve të kokainës në Lipjan.
Në një përgjigje për Klan Kosova, nga DEA thanë se përpjekja e përbashkët mes këtyre agjencive rezultoi me sukses.
“Agjencitë e përfshira janë Guardia di Finanza nga Italia, Policia e Shtetit Shqiptar, SPAK nga Shqipëria, Policia e Kosovës dhe DEA. Bashkëpunimi midis këtyre agjencive të shumta luajti një rol të ndërlikuar gjatë rrjedhës së çështjes që çoi në identifikimin dhe sekuestrimin e 400 kilogramëve kokainë si dhe arrestimin e shtatë personave”, thuhet në përgjigje.
Në hetimet e gjata ka marrë pjesë edhe Guardia di Finanza italiane, bashkë me policinë e Kosovës e të Shqipërisë.
Sipas Prokurorisë së Shtetit në Kosovës, vlera e kokainës së kapur të hënën arrin në 20 milionë euro.
