Ana Bërnabiq, kryeministre e Serbisë, shkon sot në Bruksel ku do të takojë raportuesin për këtë vend në Parlamentin Evropian, Vladimir Bilchik, përfaqësuesin special për dialog midis Prishtinës dhe Beogradit, Miroslav Lajaçk dhe Përfaqësuesin e Lartë të BE-së për Punë të Jashtme, Josep Borrell, shkruan B92, përcjell Telegrami Sot.
Bërnabiq do të jetë në darkën e sontme (e martë), ku janë të ftuar edhe liderë të tjerë të Ballkanit Perëndimor: kryeministri kosovar Albin Kurti, kryeministri shqiptar Edi Rama, Udhëheqësi i Presidencës së Bosnjë e Hercegovinës, Milorad Dodik dhe presidenti i Malit të Zi, Milo Gjukanoviq.
Sipas deklaratave të mëhershme, në darkën e punës do të diskutohet rreth situatës politike në Ballkanin Perëndimor dhe procesin e integrimit të rajonit në Bashkimin Evropian.
Kujtojmë se dje kryeministri Albin Kurti, deklaroi se kjo darkë nuk do të jetë ‘dialog midis Kosovës dhe Serbisë’ por se është një ‘darkë tradicionale”.
Por para pak ditësh, nikoqiri i kësaj darke, z.Borrell, ka deklaruar se në këtë darkë do të diskutohet ‘rreth problemeve në Ballkanin Perëndimor’ duke shtuar se në këtë rajon ‘ka disa mosmarrëveshje të thella gjeopolitike’.
