Mehaj është pyetur nga deputeti i PDK-së, Elmi Reçica lidhur me shërbimin e detyrueshëm ushtarak, se a ka qëndrim të njëjtë ministri Mehaj me kryeministrin, Albin Kurti.
Mehaj tha para deputetëve se do të punojnë në këtë plan ushtarak, mirëpo, që kjo nuk pritet të ndodhë së shpejti, sepse ka disa probleme me çështjen e buxhetit dhe duhet një plan më afatgjatë.
“Kur është çështja te detyrimi ushtarak, asnjë qytetar i Kosovës nuk ka qejf kjo mos me ndodhë, mos me marrë punën e papës apo hoxhës, ne do të punojnë në planin e detyrimit ushtarak, do ta shqyrtojmë, sa na përket buxheti, duhet me ia nis prej arsimit. Në Norvegji janë rreth 60 mijë brenda vitit, 10 mijë i zgjedhin për me kry detyrën për me mbrojtë shtetin. Një plan do ta kemi në të ardhmen, po na duhet kohë sa i përket detyrimit ushtarak”, tha ai, duke bërë të ditur se nuk e di se sa buxhet do t’i duhej shtetit për këtë.
“Duhet me të vërtetë më shumë kohë, duhet një plan gjithëpërfshirës, edhe kazerma ushtarake. Të ardhmen do të ju përgjigjem më detajisht, po në plan qeverisës është”, tha ai.
Reçica e ka pyetur tutje ministrin për qëndrimin e tij lidhur me gjendjen e jashtëzakonshme dhe atë se sa janë duke e ndihmuar shtetin në luftën me pandeminë, pjesëtarët e FSK-së.
“Pa pas nevojë me shpallë gjendjen e jashtëzakonshme ju e keni ofru mbështetjen? Se ka qenë këtu një situatë me gjendjen e jashtëzakonshme kujt i takon, a presidentit a kryeministrit”, ka pyetur Reçica.
