Përfaqësuesi i lartë i BE’së, Josep Borrell, pas takimit me kryeministrin Kurti që ka zhvilluar sot, ka thënë se nuk mund ta hedhim krejt punën e bërë nga qeveritë e kaluar, shkruan Gazeta Metro.
Borrell ka folur pas takimit që ka pasur me kryeministrin Albin Kurti në Bruksel, ai ka thënë se i ka theksuar Kurtit se nuk ka rrugë tjetër dhe as alternativ për Kosovën drejt BE’së, pa arritjen e një marrëveshje gjithëpërfshirëse ligjërisht të detyrueshme për normalizimin e marrëdhënieve me Serbinë e që është thelbësore për arritjen e perspektives europiane.
Ai ka thënë se kjo është arsyeja se përse ka inkurajuar kryeministrin Kurti. Ndërsa është shprehur i gatshëm që përfaqësuesit e rinj të Kosovës bashkë me Miroslav Lajcak t’i njoftoi me procesin e dialogut.
“Unë dhe ekipi im, posaçërisht i Dërguari im Special [për Dialogun Beograd-Prishtinë dhe çështje të tjera rajonale të Ballkanit Perëndimor] Miroslav Lajcák – faleminderit Miroslav për punën që po bëni – jemi gati të ndihmojmë përfaqësuesit e rinj të Kosovës për t’u njohur me procesin , e cila tashmë është duke vazhduar, ne nuk po e fillojmë tani,” ka thënë Borrell.
Ai tutje e ka theksuar se dialogu Kosovë-Serbi nuk ka filluar sot, dhe se nuk mund të hidhet nga dritarja e gjitha puna e bërë nga qeveritë e kaluara
“Ne kemi punuar për të me qeverinë e mëparshme, dhe ne nuk mund ta hedhim nga dritarja punën e bërë me qeverinë e mëparshme, ju duhet të jeni të vetëdijshëm për këtë, të njiheni me të, në mënyrë që të vazhdoni procesin. Në mënyrë që të vazhdojmë procesin pa vonesa të konsiderueshme dhe të prodhojmë rezultatet e nevojshme”, tha Borrell.
