Sot kanë rifilluar gërmimet për gjetjen e trupave të personave të zhdukur gjatë luftës së fundit në vend, te varrezat e myslimanëve në veri të Mitrovicës.
Lajmin e ka bërë të ditur drejtori i Institutit të Mjekësisë Ligjore të Kosovës, Arsim Gërxhaliu.
Sipas tij, sot kanë rifilluar punën për gjetjen edhe të mbetjeve tjera mortore në veri të Mitrovicës, pas gërmimeve të cilat i kanë kryer javën e kaluar në Arbanë të Prizrenit ku siç tha ai kanë ekshumuar një trup.
“Gërmimet kanë rifilluar javën e kaluar. Në Arbanë të Prizrenit kemi ekshumuar një trup, dhe sot ka qenë e planifikuar në veri të Mitrovicës te varrezat e myslimanëve, të cilat kanë filluar në orën 09:00”, ka thënë Gërxhaliu.
Gërxhaliu po ashtu tha se punimet do të zgjasin 15 deri në 20 ditë punë, duke përfshirë këtu edhe një zonë të Serbisë, saktësisht në Kizhevak të cilat punime do të rifillojnë më 5 maj.
Edhe kryetari i Shoqatës së të pagjeturve në Mitrovicë, Bajram Çerkini konfirmoi se sot kanë rifilluar gërmimet për gjetjen e personave të zhdukur gjatë luftës së Kosovës, te varrezat e myslimanëve në veri të Mitrovicës.
“Jam në veri të Mitrovicës, te varrezat e myslimanëve pasi kanë filluar punimet”, ka thënë Çerkini.
Ndërkaq, ditë më parë për telegrafin nga zyra e informimit të Ministrisë së Drejtësisë treguan për rifillimin e punimeve në territorin e Serbisë.
Nga kjo zyrë po ashtu treguan se deri më tani janë identifikuar dy persona nga Rrezalla e Skenderajt.
“Ju njoftojmë se ekspertet e Mjekësisë Ligjore do të vazhdojnë punimet nga data 5 maj 2021, me dekonservimin e terrenit – dhe zhvarrimin e trupave. Gjithashtu ju njoftojmë se deri më tani janë identifikuar dy persona nga Rrezalla e Skenderajt”, thuhej në përgjigjen e tyre.
Advertisement
Ndryshe, pas përfundimit të luftës në Kosovë, në vitin 1999, rreth 6,500 persona kanë qenë të zhdukur.
Që nga ajo kohë janë kryer disa zhvarrime në varreza masive në Kosovë dhe Serbi dhe deri më tash janë gjetur rreth 70 për qind e të zhdukurve.
Sipas autoriteteve në Kosovë, të pagjetur vazhdojnë të jenë edhe rreth 1,600 persona, kryesisht shqiptarë.
Ndriçimi i fatit të personave të zhdukur është një nga pikat e marrëveshjes për normalizimin e marrëdhënieve ekonomike, e cila është nënshkruar më 4 shtator në Uashington nga kryeministri tashmë në detyrë i Kosovës, Avdullah Hoti, dhe presidenti i Serbisë, Aleksandar Vuçiq.
Çështja e të zhdukurve është gjithashtu në agjendën e dialogut për normalizimin e marrëdhënieve midis Kosovës dhe Serbisë, i cili ndërmjetësohet nga Bashkimi Evropian (BE).
