Albin Kurti, kryeministër i Kosovës, mori kritika të shumta sot pasi votoi në zgjedhjet në Shqipëri. Në krah, deri tash i doli ish-boksieri shqiptar, Luan Krasniqi, shkruan Gazeta Sinjali.
Raportuesja për Kosovën në Parlamentin Evropian, Viola von Cramon e ka quajtur të “papranueshëm” votimin e kryeministrit të Kosovës, Albin Kurti në zgjedhjet parlamentare të Shqipërisë.
“Nuk e kuptoj se çfarë është kjo. Në njërën anë, të gjithë në Kosovë ankohen për ndërhyrjen nga Serbia apo nga vet presidenti, Aleksandar Vuçiq, por në anën tjetër, kryeministri i Kosovës madje voton në një shtet fqinj. E papranueshme. Të paktën për mua”, ka shkruar von Cramon në rrjetin social, Twitter.
Edhe Enver Hoxhaj, ushtrues i detyrës së kryetarit të Partisë Demokratike të Kosovës në opozitë, ka kritikuar Kurtin, duke thënë se atij i “më shumë i interesojnë bashkëpartiakët atje se fati i bashkëqytetarëve këtu”.
Edhe ish-emisari special i SHBA-së për dialogun Kosovë – Serbi, Richard Grenell, ka reaguar pasi kryeministri i Kosovës, Albin Kurti ka marrë pjesë në zgjedhjet në Shqipëri. Ai tha se ky veprim i tregon shumë botës, duke shtuar se komuniteti ndërkombëtar duhet të dyshojë ndaj motiveve të tij.
Kryeministri Kurti, përmes një postimi në Facebook ka thënë se “votimi është detyrë qytetare për ata që e duan demokracinë”.
Ish-boksieri i njohur shqiptar, Luan Krasniqi, i ka dalë në mbrojtje kryeministrit Albin Kurti i cili u kritikua pasi votoi në zgjedhjet parlamentare në Shqipëri.
Në fotografitë të cilat Kurti i ka postuar në Facebook gjatë procesit të votimit, Krasniqi ka shkruar se ai është shqiptar i vërtetë.
“Albin, ti ishte dhe mbetet një shqiptar i vërtetë, të lumtë”, ka shkruar ai
