Babai i 15 vjeçarit që u vra në Gradicë vazhdon të jetë në koma: Për gjendjen e tij flasin nga Klinika Intensive
Bekim Muja babai i 15-vjeçarit që u vra në pyllin e fshatit Gradicë të Drenasit, po vazhdon të jetë në gjendje të rëndë në Klinikën Intensive në QKUK. I njëjti ndodhet në koma, për shkak të plagëve të marra nga arma e zjariit.
Doktorët e përshkruajnë gjendjen e tij si shumë të rëndë, në aspektin e përgjithshëm.
Shefi i Intensives, Shaqir Uka, në një prononcim për Gazetën Express tha se gjendja e Bekim Mujës vazhdon të jetë e rëndë dhe i njëjti ndodhet akoma në koma.
“Ende gjendja e përgjithshme po vazhdon me qëndru e njëjtë, shumë e rëndë në aspektin e përgjithshëm. Ai është në koma edhe më tutje, gjendja është e rëndë në përgjithësi”, tha Uka.
Motivi i tragjedisë, sipas familjarëve, është mali i fshatit, në të cilin viktimat kishin shkuar për të marrë dru, por në mal kishin shkuar fqinjët e tyre dhe kishin shtënë në drejtim të babë e bir me armë zjarri. Me ç’rast në vendin e ngjarjes kishte ndërruar jetë A.Muja 15-vjeç, i cili u varros dy ditë pas tragjedisë së ndodhur.
Departamenti për Krime të Rënda në Gjykatën Themelore të Prishtinës ka caktuar masën e paraburgimit prej një muaji ndaj dy të dyshuarve për vrasjen 15-vjeçarit dhe plagosjen e babai të tij në Gradicë të Drenasit.
Siç thuhet në njoftim, Xh.B dhe A.B, akuzohen për dy vepra penale “Vrasje e rëndë” dhe “Mbajtja në pronësi, kontroll të paautorizuar të armëve”.
“I pandehuri XH.B. me datë 06 prill 2021 pasi kishte dëgjuar një motor -sharrë duke prerë dru në zabel, me vete kishte marrë të pandehurin A.B. djalin e tij dhe një pushkë gjuetie dhe me veturë kishin shkuar në vendngjarje, respektivisht në zabel, dhe aty i pandehuri XH.B., me pushkë gjueti kishte privuar nga jeta tani të ndjerin A.M., 15 vjeçar, ndërsa ka mbetur rëndë i plagosur i dëmtuari B.M. babai i të ndjerit, i cili i është në gjendje kome në QKUK, pas një intervenimi që i është bërë në tru dhe gjendja e tij vazhdon të jetë kritike”, njoftoi Gjykata Themelore e Prishtinës.
Ndërsa, për rastin ka folur axha i 15-vjeçarit, i cili pohon se familjet nuk kanë pasur probleme në të kaluarën dhe vrasja ka ndodhur për shkak të “malit të shtetit”.
