Bekim Çollaku, ish-bashkëpunëtor i afërt i ish-presidentit Hashim Thaçi, ka folur për Marrëveshjen e 4 shtatorit të nënshkruar në Washington mes Kosovës dhe Serbisë.
Ai në Rubikon në Klan Kosova tha se deklaratat e Albin Kurtit në atë kohë për “thikat mbi harta” nuk dolën të jenë asgjë më shumë sesa për konsum politik.
Çollaku tha se do të dontë që Kurti të udhëtonte në Washington me ish-presidentin Thaçi dhe të bindej për të gjitha.
Tutje shtoi se “thikat mbi harta” dhe gjërat e këqija për Kosovën nuk gatuhen në Shtëpinë e Bardhë.
“Ky ka qenë një proces i mirëpërgatitur nga Shtëpia e Bardhë me vëmendjen më të lartë nga presidenti Trump në atë kohë dhe ambasadori Grenell dhe më vjen mirë që përkundër kësaj që ndodhi me presidentin Thaçi dhe të tjerët edhe përkundër këtij dëmi që i është shkaktuar Kosovës, prapëseprapë një marrëveshje e tillë në rrethana të tilla u punua gjatë, u arrit dhe shpresoj që e njëjta të zbatohet edhe në praktikë”.
“Edhe vet koha e tregoj që gjitha këto deklarata nuk dolën të jenë asgjë më shumë se deklarata të thata për konsum të brendshëm politik, sepse thika mbi hartë e sidomos në Shtëpinë e Bardhë, thikat mbi hartë dhe gjërat e këqija nuk gatuhen në Shtëpinë e Bardhë për Kosovën”.
“Në Shtëpinë e Bardhë janë bërë diskutime vetëm për fuqizimin e shtetësisë së Kosovës. Gjëja më e mirë në atë kohë do të ishte që z. Kurti si kryeministër në atë kohë të udhëtonte pa hezitim me presidentin Thaçi në Shtëpinë e Bardhë dhe do të bindej për të gjitha, sepse kjo do të ishte gjëja më e mirë. Por, fatkeqësisht ajo nuk ndodhi për shkak të paragjykimeve që kishte, që vet ish-kryeministri i bëri publikë. Është mirë që asgjë nuk ka ndodhur”.
Bekim Çollaku tha se në diskursin zyrtar nuk ka ekzistuar termi “ndarje”.
Ai tha se Hashim Thaçi është angazhuar që Kosova ta ketë një marrëveshje sa më të mirë.
