Qysh nga fillimi, ka diçka topitëse në filmin debutues të metrazhit të gjatë të Lendita Zeqirajt, “Shpia e Agës”.
Menjëherë zhytemi në mesin e një grupi grash që nën rrezet përcëlluese të diellit shkëmbejnë anekdota të kripura, në një shpat të largët kodre në Kosovë, ndërsa përgatisin ushqim. Qeshen, hahen mes vete dhe thumbohen duke iu referuar moshës, joshjes, përvojës seksuale dhe, në fakt, mungesës së saj, shkruan sot Koha Ditore.
Ama muhabetet e tilla të kripura dhe kukurisjet duken si të paqëndrueshme dhe të dyshimta, sikur do të mund të merrnin fund çdo moment, sikur këto gra, në ikjen e tyre prej shoqërisë, jetojnë sa më zhurmshëm dhe stuhishëm që munden për ta mbytur zërin e bombës së kurdisur të së shkuarës nëpër të cilën vallëzojnë. Për një film pa të qeshura të tilla, “Shpia e Agës” është një përjetim intensivisht i ankthshëm.
Të katër gratë jetojnë në të ashtuquajturën “shtëpi refugjatësh” për sa kohë: e bukura, flirtuesja dhe joseriozja Emira (Rozafa Çelaj); shoqja e saj më e mirë dhe partnerja në grindje Luma (Adriana Matoshi); Kumrija (Shengyl Ismaili) nëna e dërrmuar e nëntëvjeçarit Aga (Arti Lokaj); dhe Gjyla (Melihate Qena) një e ve në të shtatëdhjetat që është nxjerrë nga shtëpia pasi që i biri i saj vritet gjatë luftës në Kosovë, meqë mbeti pa asnjë të afërm të gjinisë mashkullore.
Kësaj katërsheje i shtohet edhe e pesta, Zdenka (Rebeka Qena), një grua kroate e moshës së mesme, ardhjen e së cilës pjesa tjetër e grupit e sheh me dyshime.
Megjithëkëtë Aga, djaloshi i shqetësuar, kureshtar dhe dukshëm më i zgjuar për dikë të kësaj moshe e që jeton kaq larg qytetit, shoqërohet me Zdenkën dhe kësisoj e zbulon pavetëdijshëm anën e saj të vërtetë, pasi që ajo provon të vetëvritet.
Opsioni i vetëm për ta shpëtuar është që ta kërkojë ndihmën e Cerës (Basri Lushtaku), një burrë arrogant dhe figura më e afërt e babait për Agën. Jo se Cera është i besueshëm – ç’është e vërteta ngacmimet e tij të vazhdueshme ndaj Lumës ia kanë përfituar kufizimin për t’iu afruar shtëpisë – por ngase është i vetmi në rrethinë që ka një veturë dhe mund ta bartë Zdenkën në spital…..(Më gjerësisht lexoni në Koha Ditore)
