IKD ka ardhur në përfundim se prokurorët e Zyrës së Kryeprokurorit të Shtetit janë funksionarët publikë më të paguar në Kosovë ndërsa avancimi i tyre bëhet në mënyrë të kundërligjshme, për çka të shtunën ka publikuar raportin “Ligjshmëria e avancimeve dhe përfitimeve në Zyrën e Kryeprokurorit të Shtetit”.
Gzim Shala nga ky institut tha se Zyra e Kryeprokurorit të Shtetit është shndërruar në një zyrë të pensionistëve por që këta “pensionistë” janë të ri në moshë.
“Kjo zyrë (ZKPSh) është shndërruar në njëfarë forme në zyrë të ‘pensionistëve’, të cilët paguhen nga buxheti i Republikës të Kosovës dhe të cilët janë të ri në moshë, dhe të cilët ngritën në këtë zyrë duke parakaluar të gjithë kolegët e tjerë, që janë në nivele më të ulëta… Këto avancime janë bërë në mënyrë të kundërligjshme dhe janë favorizuar nga ana e kryeprokurorit të shtetit, z. Aleksandër Lumezit. Që nga viti 2017 deri në vitin 2020, ZKPSh asnjëherë nuk ka pasur problem me numrin e lëndëve, me efikasitet 98-99, mirëpo prapë se prapë numri i prokurorëve është ngritur. Kontestuese është sesi është ngritur ky numër i prokurorëve”, tha ai, raporton KP.
Sipas tij, avancimi i kundërligjshëm i Kujtim Munishit dhe Agron Qalajt janë disa raste të kësaj natyre, teksa e ka quajtur të kundërligjshëm edhe avancimin e prokurorit Bahri Hyseni në Zyrën e Kryeprokurorit të Shtetit, për çka ka thënë se ka konflikt të hapur të interesit.
Për këtë arsye hulumtuesi Lavdim Bajraktari tha se kanë kërkuar nga kryeprokurori i Prokurorisë Speciale të Republikës të Kosovës të iniciojë hetim penal kundër kryeprokurorit të shtetit Aleksandër Lumezi dhe prokurorit Bahri Hyseni për konflikt të interesit me rastin e avancimit të këtij të fundit në Zyrën e Kryeprokurorit të Shtetit, duke ndaluar një herë e mirë avancimet e kundërligjshme në këtë zyrë.
“I propozojmë Kryeprokurorit të Prokurorisë Speciale që të iniciojë hetim penal kundër kryeprokurorit të shtetit Aleksandër Lumezit dhe prokurorit Bahri Hyseni për konflikt të interesit, me rastin e avancimit të këtij të fundit në Zyrën e Kryeprokurorit të Shtetit”, tha ai.
Ai tha se gjatë deklarimit të pasurisë së prokurorëve kanë vërejtur që të ardhurat e tyre nga aktivitetet e tjera e kalojnë shifrën e përcaktuar prej 25 përqind të pagës bazë, që është përcaktuar si tavan.
