Fondacioni “Përkrahje për Mbrojtjen Juridike të Hashim Thaçit”, përmes një videoje dhe postimi në llogarinë në rrjetet sociale, sot në 22 vjetorin e nisjes së punimeve të Konferencës së Rambujesë, ka kujtuar kohën kur delegacioni i Kosovës udhëhiqej nga Hashim Thaçi si lider politik i Ushtrisë Çlirimtare të Kosovës.
Pjesëmarrja e delegacionit të Ushtrisë Çlirimtare të Kosovës në kuadër të delegacionit të Kosovës ishte cilësuar gjithnjë si tregues i pjekurisë së lidershipit të saj, që çështjen e Kosovës e ndërkombëtarizoi në shkallën më lartë.
“Më 6 shkurt 1999, për herë të parë në histori, Kosova ishte e pranishme në një konferencë ndërkombëtare, të organizuar nga shtetet e Grupit të Kontaktit në Rambuje të Francës. Në krye të delegacionit të Kosovës, që përbënte forcat themelore politike, ishte përfaqësuesi politik i Ushtrisë Çlirimtare të Kosovës, Hashim Thaçi.
Konferenca e organizuar nga shtetet e Grupit të Kontaktit u finalizua në Paris, më 18 mars 1999, me nënshkrimin e dokumentit nga delegacioni i Kosovës dhe refuzimin nga ana e delegacionit të Beogradit. Ky refuzim nga delegacioni i shtetit serb bëri që Bashkësia Ndërkombëtare përmes aleancës më të fuqishme ushtarake të botës, NATO-s, të fillonte bombardimet e pozicioneve ushtarake dhe policore të forcave serbe.
Pjesëmarrja e delegacionit të Ushtrisë Çlirimtare të Kosovës në kuadër të delegacionit të Kosovës ishte tregues i pjekurisë së lidershipit të saj, që çështjen e Kosovës e ndërkombëtarizoi në shkallën më lartë.
Pas periudhës 78 ditore të bombardimeve, më 9 maj 1999, në Kumanovë u nënshkrua marrëveshja e kapitullimit të Jugosllavisë së mbetur të Sllobodan Millosheviqit. Më 12 qershor, Kosova shënon ditën e çlirimit dhe fillimin e rrugës drejt pavarësisë”, thuhet në postimin e Fondacionit në Përkrahje të Thaçit.
