Kryeministri i Shqipërisë, Edi Rama, ka bërë të ditur se sot do të mbërrijnë dozat e vaksinës “Pfizer” kundër COVIDIT-19.
Rama ndër të tjera ka zbuluar se dozat do të jenë më pak sesa ato që ishin porositur, por sipas tij më e rëndësishme është që të fillojë faza e dytë e vaksinimit, në Shqipëri.
“Sot, do të vijnë doza më pak sesa ato që ishin porositur, por e rëndësishme është që fillon vaksinimi i dytë”, tha Rama para gazetarëve, pas përfundimi të mbledhjes me drejtuesit politikë të Partisë Socialiste.
Kreu i Qeverisë shqiptare tha se pritet të arrihet një marrëveshje edhe me “AstraZenecan”.
“Nuk jemi as në dorë të mekanizmit të “COVAX”-it që dhe aty problemi është i jashtëzakonshëm, kanë filluar kërcënimet për hedhjen në gjyq për kompanitë në vende të mëdha të BE-së, ne kemi një mbështetje në kohë pasi dozat e para të “Pfizer”-it do të vijnë në javën e tretë të janarit dhe sipas konfirmimit, dozat e para vijnë sot në darkë dhe do të vazhdojnë me faza, ndërkohë që jemi shumë afër me një marrëveshje përfundimtare me “AstraZeneca”-n, ndërkohë që vazhdojmë kontaktet me tre shtete, jemi në rrugë të mbarë. Skenari i parë i vaksinimit brenda 14-muajsh nuk ka rënë akoma, pavarësisht vonesave. Do të vazhdojmë me mjekët dhe infermierët dhe paralelisht do të vazhdojmë dhe me të moshuarit”, përfundoi Rama.
