Koha kur ata do të duhej të ishin në shkollë, i zuri në rrugë. Nxënës e prindër së bashku, po e kundërshtojnë mbylljen e shkollave në fshatrat e Kamenicës.
Kjo për shkak të reformave në arsim që ndërmori i pari i kësaj Komune, Qëndron Kastrati.
Një numër i madh i atyre që janë të pakënaqur nga kjo situatë bllokuan rrugën kryesore të Kamenicës këtë të hënë.
Gjithçka po shkonte qetë, deri në një moment.
Situata u tensionua edhe më shumë kur protestuesit u afruan afër objektit të Komunës në Kamenicë.
Këtu, Policisë që po e monitoronin situatën, u doli punë me disa protestues.
Madje, njërin nga ta u panë edhe duke e larguar nga turma e protestuesve.
Zëdhënësi i Policisë për rajonin e Gjilanit, Ismet Hashani ka treguar se gjatë kësaj proteste janë arrestuar 4 persona.
Ndërkohë kryetari i Kamenicës përmes një statusi në Facebook tha se është i papranueshëm keqpërdorimi i fëmijëve në protestë.
Sipas tij kjo protestë ishte e grupe të caktuara për interesa politike e personale.
